O le faatupulaia pea o solitulafono e mafua mai i le faaaogāina o fesootaiga televavave faaonaponei, e pei o telefoni feaveai ma isi mea faitino o loo maua ai ia ituaiga o fesootaiga ua galulue faatasi ai nei le matagaluega o leoleo ma kamupani telefoni o le BlueSky ma le Digicel e faia se polokalame e faalauiloa ai le ogaoga tele o ia soligatulafono ua molimauina le siitia pea ma ua aafia ai le tupulaga.
O mataupu o loo fofogaina i le faamasinoga faaitumalo ma le faamasinoga maualuga e lē o ‘asa ai lava ma solitulafono faapenei i le ave o se feau tusitusia a se alii ua ole ai se tamaitai, poo ni faamatalaga matagā ma isi lava mau gaioiga lē lelei e pei o ata video e pue i telefoni o ni faiga matagā ona faasalalau ai lea.
Faaalia e le sui Komesina o le matagaluega o leoleo le susuga Fauono Talalelei Tapu, o loo silasila nei se komiti o loo feagai ma le toe iloiloina o solitulafono e mafua i fesootaiga televavave faaonaponei, ia aofia ai ma faiga faapea i luga o fesootaiga i upega tafa‘ilagi, ae ua aofia ai nei telefoni feaveai, ma fesootaiga tau Social Media e pei o le Facebook, Twitter, ma isi.
Ua faaalia e le sui komesina o le taimi nei o loo iai i latou o loo tuli faasalaga i le falepuipui ona o ni gaioiga faapea i luga o fesootaiga tau upega tafa‘ilagi.
O le faia o le faalauiloa a le matagaluega o leoleo i le tetee atu o soligatulafono e mafua mai i fesootaiga televavave faaonaponei, ua ogatasi ma polokalame faapea o loo faatāua e atunuu uma o le lalolagi i le taimi nei.
