Multifest a State High School sa faatasia i le Robelle Domain Springfield
E tele Aoga sa auai ma faatinoina faafiafiaga ma taleni, ma na sili ona lagolago malosi i ai le toatele o tagata Pasefika e aofia ai ma Samoa.
O le BEAMS (Building Engagement and Aspirations through Mentoring in Schools), ma o le finagalo o Professor Kavanagh, o ia na uluai fafauina lenei poloketi, na ta‘ua ai e faapea o le BEAMS o se polokalame e unaia ai ma faamalosia le tele o aoga ma faalapotopotoga ina ia fai ma faataitaiga lelei i tupulaga fai a‘e.
O le polokalame lava lenei o loo fesoasoani malosi e faasoa atu ma saga faamalosia nisi o augatupulaga auā se manuia agai i luma. O le ala lea o loo galulue ai ma sauniuni le toatele o tamaiti o le U.S.Q. a Springfield e tusa ma le 183 tamaiti ua aoaoina e faasoa atu ma fesoasoani i Aoga e 43 i le Western Corridor Region. Ua avea lava i latou ma alavaa e faailoa atu ai ni taleni ma tufa atu ni tomai e tulimatai i ai tupulaga talavou ina ia taunuu a latou moemitiga. O le aso faapitoa i le Aso Faraile 19 o Setema, sa galulue ai le BEAMS e fai sao i lea aso ma faafoeina polokalame uma a o feagai alo ma fanau mo le faalauiloaina o tu ma aga a atumotu o le Pasefika.
Na ta‘ape le aofia ma le agaga fiafia auā o se avanoa lelei lenei sa fefaasoaa‘i ai taleni a tupulaga talavou aemaise o alo ma fanau a le Pasefika.
