Tala Pauga & Sau Siufanua Seuseu
E fai o le anoanoai o le tele o taleni i taaloga, tomai eseese, o galuega , ae o se tasi lenei o faamanuiaga o loo lē mapu pea ona tauaao mai i tagata lautele mai lea taimi i lea taimi, ma o se taleni e lē au uma i ai le toatele.
O nisi foi o taleni e fua lava fatuga faapea fetii o fatuga fou i au o le tai, taaviliga o le matagi i fesouaiga o le olaga, e le gata i lea a o fesuiaiga o le felanulanuai feemoai o tupuaga fou i mea tutupu mai lea taimi i lea foi taimi.
Ma o lenei taleni o le pese o le mau a toeaiina o i lea sa tele ina teu agai i ai le oa o le gagana, ua faitau fia le anoanoai o tamalii Samoa o loo iai le faamanuiaga faafatupese aemaise ai foi le faaleoina lea o pesega.
O le faaiuga la o le vaiaso nei, o lea ua tapena i ai le susuga ia Tala Pauga faapea le susuga ia Sau Siufanua Seuseu e faalauiloa ai le la tautua pese lona 8 o fatuga ma ua faaautu “Malie Oe Mama”.
O ni faafiafiaga o pese faamomoi loto, faasolo mafaufauga, toe maua ai faasiliga malosi i tauiviga o le olaga fesouaina. O nei alii e talavou toe siufofoga mālie ua mae‘a nisi o a la tautua pese o loo atagia ai le tele o le lumanai i pesepesega ma faafiafiaga i musika. O se tasi o vaega tāua i nei tamalii e foliga mai e tupuga mai i nisi lauiloa foi i musika i aso ua mavae ma o loo faaauauina ai lea taleni.
O Uafato i Fagaloa, Faleu Manono, Sapo‘e Falealii, Lalomauga, Vailoa-tai Tutuila, Lepea, Fusi Safata, ma Papauta o nisi ia o afioaga e tupuga mai ai nei alii, ma ua fuafuaina le nofoaga o tamalii ma tausala le Parataiso i Otara e faalauiloa ai lenei tautua pese.
O loo valaaulia ai foi nisi pepese e pei o Laei Soia Avauli, Salati Seuseu, ma Ashley Puepuemai faatasi ai ma Bad Enough i faafiafiaga o le po, le fa‘ili lauiloa a le Moonlight Boys ia Mautoatasi i faafiafiaga o evaga o lea po, ona sosoo ai lea ma le isi faafiafiaga tele i le Club8 i le vaiaso a sau i le taulaga faatau i Magele.
