O le masina o Aokuso i lona faaiuga ma le amataga o Setema lea ua fuafuaina e faataunuuina mai ai i Samoa le fonotagaa a lona 3 Atumotu Laiti Tauatiae o le lalolagi. O lenei fonotaga o loo fuafuaina e silia atu ma le 3,000 le faitau aofai o i latou o loo faapea ona auai mai ai. O se vaega o lenei fonotaga o le a faapea ona faatalanoaina ai ni auala e fesoasoani ai i tupulaga talavou auā le atinaeina o ni vaega e mafai ona o latou galulue ai auā le manuia o atunuu taitasi. O nisi o nei auala o loo faamoemoe e atinaeina e aofia ai le faatauaina o avanoa e mafai ona fai ai ni atinae e pei o faatoaga, togalaau ‘aina, togalaau faisua, lafu puaa, pa povi ma le tele o nisi vaega e pei o le vaneina o meataulima, faaleleia o le lalagaina o isi measina e pei o ietoga ma siapo ma le anoanoai o atinae e mafai ona maua mai ai ni alagatupe auā le atinaeina o aiga, nuu, ekalesia ma atunuu.
O le ala lea o le polokalame sa faapea ona faataunuuina i le Aso Gafua o le vaiaso na tea atu nei, e pei ona sa tatala aloaia ai tapenaga a Tupulaga Talavou a le atunuu auā sauniuniga mo lenei fonotaga. O lenei polokalame sa faatautaia lea e le Matagaluega o Tina ma Tamaitai, Atinae o Nuu ma Afioaga ma Aga Fesootai i lalo o le vaega o Tupulaga Talavou. Sa faapea ona auai mai ai sui mai le faalapotopotoga a le UNESCO, Foreign Affairs, UNDP atoa ai ma le UNV. O le afioga i le Minisita o le Matagaluega o Tina ma Tamaitai, Atinae o Nuu ma Afioaga ma Aga Fesootai, le tofa ia Tolofuaivalelei Falemoe Leiataua, o ia lea sa saunoa faapitoa e fai ma sui o le Malo sa tatala aloaia ai lenei polokalame.
E tele ni vaega sa afea i le saunoaga a le afioga i le Minisita, ae auga lava nei vaega uma i le tāua o nei tapenaga ua taimua ai le Matagaluega auā se ‘ai o Samoa mo lenei fonotaga. O le laumua a le Kolisi o Robert Louis Stevenson i Tafaigata sa faapea ona faataunuuina ai lenei polokalame, talu ai ona o se tasi o tamaitai mai lenei Kolisi o loo faapea ona fai ma sui usufono a le Pasefika i nei tapenaga mo tupulaga, le tamaitai o Brianna Fruean. O laua ma le tamaitai o Teagan Moore o le sui faigaluega o Tupulaga Talavou o Samoa o loo fai ma sui o le atunuu i le komiti o loo soalaupuleina tapenga mo lenei fonotaga.
Na faaalia e Teagan, e moomia ona lelei ma mauaa ni vaega e tatau ona lagaina e le aufono a Samoa i lenei fonotaga pe a oo ina faataunuuina mai ia Aokuso, aemaise lava o mataupu o loo faapea ona aafia ai suiga o le tau, o aafiaga i le ea ma le siosiomaga ona o kasa oona e afua mai i Atunuu Tetele o le lalolagi, a o lenei ua pagatia ai atumotu laiti ona o nei Kasa oona. Na ta‘ua foi e Teagan, e tāua tele le faatāuaina e le tupulaga talavou o ia lava ma lona siosiomaga o se talavou lelei, maloloina ma mataala i vaega uma e finauina ai mataupu auā se manuia o lona tupulaga, ma ia iai foi sona sao e aoaoina lelei ai lona mafaufau i vaega e manuia ai isi auga tupulaga. O se avanoa lelei foi e tapena atili ai le tupulaga talavou latou ia i lona valaauina auā le lumanai, auā o le upu moni a lelei ona faafailele ma tapue atu le olaga a o avea ma talavou, e lē taumate o le a tulai mai e fai ma taitai lelei i le lumanai, ma saga manuia ai atunuu.
