Faalauiloa tamaitai ole a filifilia mai ai le Miss Samoa NZ 2017-2018

Sui tauva e toafa ole Miss Samoa NZ 2017-2018 - Photos : Fata Tuialii (Miss Samoa NZ)
Sui tauva e toafa ole Miss Samoa NZ 2017-2018 – Photos : Fata Tuialii (Miss Samoa NZ)

Ole vaitau lava lenei i tausaga taitasi e nofo faatalia ai ele mamalu o Samoa i Niu Sila nei, poo ai le tamaitai talavou lalelei ole a faapaleina e tauave le pale ma tiute ole Tausala poo le Miss Samoa New Zealand 2017.

Ise pepa o faamatalaga na tuuina mai ele vaega oloo nafa ma le faatautaia o lenei tauvaga, le Pacific Events & Entertainment Trust ma le komiti ale Miss Samoa NZ, oloo ta’ua ai, e toafā tamaitai talavou ua saofagā atu nei mo le faiga ole filifiliga faaiu, lea ole a faia ile Aso Toonai, aso 8 Iulai 2017 ile Fale Samoa i Magele.

E to’a 19 tamaitai na tusi talosaga atu ma faaalia lo latou fia tauvā i lenei tauvaga ma latou faatino ai foi vaega uma e pei ona moomia e faalauiloa ai lo latou manaoga e fia tausinio.

Mai lena to’a 19 e toaono tamaitai na faia iai le filifiliga faalilolilo ale laulau o faamasino. Peitai ane, ona o ni mafuaaga lē ma’alofia na toe faaseetuagalu ai tamaitai e toalua mai le toaono na filifilia, lea la e totoe mai ai nei le toafā ole a faia iai le filifiliga faaiu ile aso 8 ole masina fou o Iulai, mo se tasi na te tauaveina le pale ole Miss Samoa NZ 2017-2018.

Ole 26 ai lenei o tausaga talu mai ona amata lenei polokalame ole sailia ose Tausala Samoa e fai ma sui o tagata Samoa i Niu Sila nei. Ma e mautinoa ose polokalame faatauvaga ua mafai ai ona faalauiloa le tele o tomai ma taleni a nisi o alo tamaitai ole Atunuu, ma ua avea ma faitotoa vatele ua latou ulufale atu ai ma faatino le tele o tomai o ni tamaitai talavou ua avea ma avefu’a poo ni amepasa mo latou atunuu ma tagatānuu.

Ile tauvaga faaiu la ole a sagai atu iai ile Aso Toonai, aso 8 Iulai, e LUA ni vaega ole a faatino e tamaitai tauva ma fua iai faaiuga ale laulau o faamasino. O vaega ia o TALENI ma le FAATALANOAGA. A mae’a lena ona sosoo ai lea ma le sausaunoaga ale tamaitai tauva ile TAUALUGA i lana Siva Samoa i lena afiafi.

Poo ai lava le tamaitai ole a tusiaao iai faamasino i lena afiafi, ole a faapaleina loa ele tamaitai oloo ia tauaveina tiute ole Tausala Samoa Niu Sila ile taimi nei, mai le 2016-2017, le tamaitai lalelei o Naomi Eta Fruean.

Mo nisi faamatalaga poo le sailia foi o pepa ulufale e auai atu ai i lenei faamoemoe tāua, e maua pe a saili ile imeli MissSamoaNZPageant@gmail.com;  Facebook.com/MissSamoaNewZealand; poo le telefoni feaveai: +64 21 138 6575

Ole lisi lenei o tamaitai ole a faia iai le filifiliga faaiu:

Natalie Toevai, 23 – Afega, Vailele

Manufa’aifomailagi Rowena Fuao, 25 – Vaimoso, Tanumalala

Brittany Tasese Stanley-Wishart, 24 – Savalalo, Vaigaga, Lepea, Leifiifi

Kahlia Renee Tapsell-Ulae, 20 – Malaemalu Falealili