E uigaese ma mataina le matuai faatumulia o le Entertainment Centre i le itu i Saute o Brisbane i le po o le Aso Toonai 21 ma le aso 22 o Fepuari, ona o le maimoaina o taleni pese ma le faatinoina o taga a nisi o alo ma fanau faapea tupulaga talavou.
E leai se isi na faatemutemu lana minoi ae toe taliu ane la i siufofoga, ia ua uma la la i le tele o taleni ma meaalofa mai le Atua o loo tuuina i alo ma fanau.
O le toatele o mātua na matuai faafiafiaina i lo latou silasila atu ma matuai faateia i le maualuga na oo i ai le eseesega o le tulai mai i totonu o le aiga ma ekalesia ma le faatinoina i se nofoaaga e filogia e tagata eseese.
O se po fiafia na vaaia foi le loifofoga maligi i le agaga nutimomoia o talaaga maualalo na faamatalaina e nisi o talavou i vaega o loo tutupu pea ma le amataga o le soifuaga ae iu lava i le faaeaina i manuia ona o le finafinau pea. E maeu le maoa‘e o le agavaa, tomai ma le talenia o nei alo o le atunuu e lata i le 100 pe ova atu foi sa faia sao.
O le agaga faafetai ia i latou sa faafoeina lenei faamoemoe e aofia ai le tamatai o Josephine Aufa‘i, Lillian Su‘a faapea le komiti i le lava tapenaina o lea faamoemoe, aemaise le faiaoga ia Igelese Ete, se ua lē ‘ole lea, i lona toe lalaga lea ma faatāua taleni a nai tamaiti ma tupulaga, ma o se sao tāua lea o le faiaoga o le Iunivesete a le Pasefika i lea lava matata, le susuga ia Igelese Ete mai Iva ma Falealupo.
Na molimauina le logo mālie o pesepesega o viiviiga o le Atua aemaise le matagofie ma le lelei faatinoina o vaega a alo ma fanau. E ova i le afe luaselau i latou sa auai i le po o le Aso Toonai ae lei tuu māmāina foi le po o le Aso Sa, na sili atu le pa pa tutu‘i ma le tumutumu o tagata. E uma upu e lē uma ona faamatala le matagofie o le lava saunia ma le logo mālie o lea faamoemoe. E mālie foi le ita o le loomatua ina ua sioa ma sisila ae emo mai loa ma le igoa faasolo foi lea “To be Continued” “E faia pea” ae faalii ai loa ma le toeaina velo i fafo le ‘ali ina ua vave uma ae lei taitai ona uma le fia maimoa. Na faapena uma lava le faafiafiaga a le “My Journey”, ua leai se isi e faalavelave a o sioa ma faasolo lemu mafaufauga o toeaiina i le onomea ma le agavaa o tamaitai o le ausiva aemaise le vavai o tino ia latou taaga.
Ua iai se kulupu ua faavae nei mai ekalesia e 15 sa auai o le a faatumauina ai pea taleni a alo ma fanau nei ma ua igoa o le Logan Youth Choir auā o le tala moni e lē uma ai le fia mafuta faatasi pea o nei tupulaga ina ia faaauau a latou taleni.
E momoli ai le faamalo i le komiti faafoe i le tapenaina lelei aemaise le susuga ia Igelese Ete aemaise o tupulaga ma alo ma fanau.
