Ua faamautu mai le lisi o Sui Tauva a le Vaega Faaupufai a le Tautua Samoa ma e to‘a 45 lava ua faamautu mai o latou suafa e tauva i lalo o le fu‘a a le Tautua ae tusa ma le to‘a 10 sui tauva o loo talosagaina le taatia o o latou suafa mo le taimi nei ae o loo agai i le Faigapalota o ni sui tutoatasi.
“O loo iai le manaoga o sui nei e faamautu mai lo latou tauva i lalo o le Fu‘a a le Tautua a o lei oo i le aso o le Faigapalota,” o se faaaliga lea a le Afioga Afualo Faamoetauloa Manu Dr Wood Salele, le Taitaifono o le Tautua Samoa. “O sui nei o loo feagai ma feutagaiga ma sui o o latou nuu ma Itumalo, ona o loo iai lava itumalo ma nuu o loo faia uiga e tau taofiofi ai le aga‘i o sui tauva nei mo le sailiga tofi o loma nei.
O loo iai nuu o loo tau faamalosia lava sui ua manatu i latou e tatau ona tauva ma ua faaali foi i o matou sui tauva, e faamalamalama i ai o le faiga filifiliga o loo faia i faiga faatemokalasi, ae e tāua lava le faatalanoa o sui o afioaga.
E faamautu mai loa la a latou feutagaiga ma o latou nuu ona faamautu foi lea o le latou tauva i lalo o le fu‘a o le Tautua Samoa”.
O se vaaiga i le lisi o suafa o i latou ua faamoemoe e tauva mo le Tautua i le faigapalota tele ua manino ai, o loo iai le paleni o sui talavou ma sui ua leva ona tautua faafaipule i lalo o isi Vaega Faaupufai i tausaga ua tuanai.
E aofia ai foi le toatele sa tautua o faipule o o latou itumalo i lalo o le Vaega Faaupufai e Puipuia Aiā Tatau a Tagata le HRPP e pei o le Afioga Fiu Matamua Lausiva Loimata II lea ua tauva mai i se tasi o tofi o le Faasaleleaga Numera 1, o le Afioga Palusalue Faapo II lea e toe tauva mai foi i le tofi o Safata, o le Afioga Gafa Ioelu lea ua tauva mai i Satupaitea ma le Afioga Feo Nemaia Esau lea ua tauva mai i le nofoa o le Itumalo o Gagaifomauga Numera 2.
Ua faapea ona aofia i sui o le Tautua Samoa i latou sa i tofi faipule o le Vaega Faaupufai sa iai mo le Atina‘e o Samoa le SNDP, e pei o le Afioga Le Tagaloa Dr Pita Pola lea o le a tauva mai i le tasi o nofoa o Palauli le Falefa ma le Afioga Letiu Polataivao Tamatoa Te‘o Penaia o loo tauva mai i le tofi faipule o le Itumalo o Aleipata Itupa i Lalo.
Faaalia e le afioga i le Taitaifono, e faamalieina lava le Vaega Faaupufai ia i latou ua faamautu mai lo latou manaoga mo le tauva ai i le fu‘a a le Tautua Samoa ma o nisi o nisi foi ua tele tausaga o tautua Samoa i tofiga o galuega eseese ma le faamoemoe ia iai se suiga i lenei palota o loma nei.
“Matou te lē faamaualuga ae o le taulai lava ia manumalo, ua tofu uma lava Itumalo faaalalafaga ma sui tauva, ma o loo iai foi nisi o itumalo o loo tailua mai sui tauva i le taimi lenei ae ua mae‘a ona talanoa le Tautua ma fautuaina e soalaupule le filifiliga e tatau ona fai i le va o sui tauva ina ia mafai ai ona manumalo le sui o le Tautua i le faiga palota”.
O le mau a le Tautua, e ioe ua tele galuega ua faatino i le nofoaiga a le HRPP ae o le taimi lenei mo se suiga ma o le manaoga o le Vaega Faaupufai ina ia tulai mai le Tautua e faalelei atili ma ia taumafai e suia ni faaletonu ua manatu le atunuu ua tatau ona faatino.
O le faaiuga o le masina nei e faalauiloa aloaia mai ai sui tauva o le HRPP ma o le taimi lenei ua latalata i le to‘a 200 sui tauva faaolioli ua mae‘a ona oo atu i le Taitaiga o le Vaega Faaupufai tele lenei ma le faamoemoe lava e tasi ia toe foi mai le HRPP e taitaia le Malo ma faamae‘a le tele o ana galuega o loo faagasolo i le taimi lenei.
