O le faleaoga a le Queensland University of Technology (QUT) na lolofi atu i ai i le afiafi o le Aso Toonai na tea nei, le toatele o alo ma fanau o loo aotauina i nei foi Iunivesite aemaise ai asosi a tamaiti Pasefika, sa faapea ona latou lagolagoina malosi le faamoemoe o le tamaitai tusitala, o se alo o Samoa, le tamaitai o Lani Wendt Young i le faalauiloaina o ana tusi ua ta‘ua o le Scarlet Lies ma le Scarlet Secrets.
Na lologo ma sioa le aofia a o faamatala foi e le tamaitai lona talaaga i le tulai mai o lana ia foi taleni, ma o se luitau tele i tupulaga a o feagai ma aoaoga ina ia aua le fiu gofie i le tausinioga. Na ia ta‘ua nisi o ‘Fs’ sa faatāuaina e iai le fiapoto ma le fiapalagi.
E iai a le manatu o nisi a fia poto se isi ona faapea lea e leaga, ae leai, o la e fia maua le poto. E mafua ona alu i le aoga o le fia maua o le poto.
O le itu lelei na maitauina i le saunoaga a le tamaitai tusitala, o le amata mai o lona soifuaga o se tagata e finau tele, e tiga lava ona sāua i lana faalogo tala a tagata, peitai e lei solomuli lava auā na ia mautinoa e iai le avanoa mo le isi foi tusi e pei la ona iai foi lenei tusi lea ua faalauiloa i lenei vaiaso.
Sa lagolagoina malosi lenei faamoemoe e le QUT Pasifika Association, Griffith Pasifika Association ma le UQ South Pacific Islander Association ma o lea faamoemoe sa faia i Kelvin Grove e lē mamao ma le taulaga o Brisbane. Na faaali ai foi taleni a nisi e pei o ituaiga deserts e iai le banana cake, cup cakes ma nisi. Na maua foi faailoga sa manumalo ai nisi, ma o se po na maua ai le ‘ata ma le fiafia i agavaa foi o i latou sa faia ni sao e pei o nisi o alo o le atunuu e aofia ai ma Glenda Stanley.
Sa faatauina le tusi o le Scarlet Lies i le $25 tala. Na manaia le lagolago a alo ma fanau faapea mātua, aemaise le afioga i le peresetene o le Aiga Samoa i Matu sa auai, afioga ia Taulapapa Lemalu Roy ma Joyita Slade, pule sili o le Sina World Travel, Steve ma Lemalu Tuuu Patricia Sevele, faapea nisi o faletua ma tupu ma tamalii o le atunuu aemaise faafeagaiga.
