O se tasi lenei o tamaalii logologoa o lo tatou atunuu i le taleni o le musika ua loa nai tausaga e lē o toe faafofoga Samoa ma faalogoina ana fatufatuga i Ausetalia, peitai o lea ua a‘e manumalo faiva o Faaeteete Manu i le mae‘a ai o tausaga e sefulu ma le lua 12, o alala ma papaaao i le malo tele o Amerika, ae toe taliu mai e faalauiloa lana taleni pei ona lausilafia ai, ae fofola mai e 4 ana CD o loo faatau atu mo le mamalu o Samoa i Melepone.
O le Aso Faraile na tuanai atu aso 30 o Novema, na afea le aai tele i le faigamalaga a le tamaalii sailimalo ona o lona agaga e tauaao atu i auaunaga o faleoloa o loo tautuaina Samoa ana CD nei e 4, auā le faafofogaaga a lona atunuu pele.
O CD nei e 4 a Faaetete e aofia ai lana CD numera 29 ma le 30. O fatufatuga faaleagaga, aemaise o lana CD o pesepesega o le Kerisimasi lea ua fetaui tonu le taimi e faalauiloa ai ma le sauni atu mo le faamantuina o le soifua mai o le Alii Faaola o Iesu Keriso e pei ona mafua ai le Kerisimasi.
Na talisapaia e le tele o auaunaga le susū mai o Faeteete, aemaise lava faleoloa Samoa, ma nisi o faleoloa o tagata Fiti ma Initia. Maitauina le alumia o CD fou nei, ai ona ua leva faatoa toe faafofoga nei o Samoa i le siufofoga mālie o lenei foi tamaalii pese, faatasi ai foi ma le lagolago o nisi o leitio Samoa e faalauiloa ana pese i luga o le galugalu o le ea.
Na fesiligia le susuga ia Faaeteete pe na faamalieina lona finagalo i le lagolago a le atunuu, ma ia saunoa ai, ua malie atoatoa lona faamoemoe ona e ui ua umi se taimi, ae o lea lava e tumau le fiafia o Samoa e faafogafoga i ana musika.
Na molimoli ai ma lana faafetai i le paia lasilasi o Samoa, ona o lo outou lagolago malosi ia outou tamafanau o saili se ‘ai ma se malo mo Samoa mo a taeao. Faafetai lava Samoa.
