Ua mae‘a faalauiloa ata o le pine e lolomi mai ai ata o pine auro, siliva ma le apa memea, faapea ai ma se ata o le mascot o le a faaali i malae ma fale e fai ai taaloga a Tupulaga Talavou o Malo o le Taupulega.
O le faalauiloa ai o lea faamoemoe a le Ofisa a le Faalapotopotoga o Taaloga a Malo o le Taupulega i Samoa nei, na faatautaia lea i le Falesamoa a le Pulega o Tagata Tafafao Maimoa mai Atunuu i fafo.
O le tauvaga lea na faatautaia lava i totonu o Samoa e sailia ai se tagata na te mafai ona tusia se ata o le pine e mafai ona lolomi i luga o pine o le a faaaogāina mo ia taaloga.
E lē gata i lea, ae o le tauvaga foi mo se isi e na te tusia se ata o le mascot e faaali i totonu o malae ma fale o le a faatautaia ai taaloga.
Peitai i lea tauvaga na manumalo ai le tamaitai o Nadya Vaa i le faailoga e $2,000, i le manumalo ai o lana ata na tusia e lolomi ai pine o le a faaaogāina i taaloga.
O le alii o Sale Tago na sola ma le $1,000 o le manumalo i le tusia o le ata o le mascot lea o le a faaalia i soo se fale ma malae e faia ai taaloga. I le ata a le tamaitai o Nadya, o loo faailoa ai le tāua o le sao o taaloga o tupulaga talavou o Malo o le Taupulega mo le lumanai manuia e pei ona faamatalaina i le ata o le tatau Samoa.
A tagatagai i le ata e pei ona tusia, e pei o ni manulele o loo feleleai, e faapena le olaga o le tagata Samoa e pei ona faamatalaina, e tagai agai i luma lona atinaeina.
E pei lava o le olaga o Samoa, e finau mo se lumanai manuia, e pei lava ona faamatalaina i le ata na tusia e le tamaitai o Nadya.
Peitai i le ata e pei ona tusia e le alii o Tago, o loo faatāuaina ai le manu a Samoa o le ‘Manumea’, o loo faamatala ai le pulou launiu a Samoa aemaise o vaega e faaaogā e tulafale e faafeiloai ai soo se malo e taunuu mai i Samoa.
E pei ona silafia o taaloga o le a talimalo ai nei Samoa, o Taaloga a Tupulaga Talavou a Malo o le Taupulega. O le aso 5-11 o Setema 2015, lea ua fuafua e faataunuuina ai taaloga.
E 53 le aofai o Malo o le Taupulega ma le 18 o Teritori o nisi o atunuu o le Taupulega ona maua ai lea o le aofai o ‘au e 71 o le a tausinio i nei taaloga. E iva taaloga lea ua faailoa mai, o le a tauva i ai sui o atunuu o le a auai i ia taaloga.
O le taimi muamua lea ua talimalo ai Samoa i Taaloga a Tupulaga Talavou a Malo o le Taupulega, talu ona mae‘a ona talimalo ai Sikotilani i le tausaga e 2000.
E lē gata o se taimi muamua ua talimalo ai Samoa, ae o se taimi muamua foi ua talimalo ai se atunuu tau atiae laitiiti, ae o se atunuu foi mai le Pasefika.
O se avanoa tāua lea mo Samoa, auā o le a mafai ai ona faailoa atu i le lalolagi atoa, aganuu aemaise o le tomai ua mafai ona ausia i tulaga tau taaloga.
E lē gata i lea, ae o se avanoa foi mo tupulaga talavou o Samoa, e faalauiloa atili ai le taleni, aemaise o tomai eseese ua maua e faatino ai soo se taaloga o le a tauva ai.
O le naunautaiga lea o le Malo e pei ona iai manulauti ma anavatau, o le saili lea o tauvaga e faalauiloa atili atu ai alo ma fanau a Samoa, ma iloa ai le tele o agavaa ma tomai o loo i tupulaga talavou o Samoa.
