Minisita o Taaloga ma Aganuu, Loau Keneti Sio faapea i laua sa tusia le logo o taaloga a le Pasefika Suivu Mah Yuen (ofu lanu moana) ma Fresh Irwin Kennar (ofu paepae)

Minisita o Taaloga ma Aganuu, Loau Keneti Sio faapea i laua sa tusia le logo o taaloga a le Pasefika Suivu Mah Yuen (ofu lanu moana) ma Fresh Irwin Kennar (ofu paepae)

O le po o le Aso Faraile na tea nei i le faletalimalo o le Tanoa Tusitala na faalauiloa ai le Logo faapitoa ua manumalo ma o le a faaaogaina mo taaloga a le Pasefika lea e talimalo ai Samoa i le tausaga fou 2019. Na tumutumu sui o atunuu eseese o le Pasefika i lea sauniga e pei ona avea ai le Minisita o Aoga, Taaloga ma Aganuu le Afioga ia Loau Solamalemalo Keneti Sio ma lauga faapitoa.

Na saunoa faafetai Loau i le tulaga ua iai tapenapenaga a Samoa mo ia taaloga aemaise o le aumai ai o le faatuatuaga o komiti o taaloga nei a le Pasefika e talimalo ai Samoa ina ua toe faamaamulu ese mai ai le Malo o Toga mai i lana taligamalo. Na viia foi e Loau le galulue punouai ai o le komiti o taaloga nei a Samoa mo le vave ona toe tapena ai o faletaalo ma malae taalo ina ia oo atu i le tausaga fou ua sauni mea uma.

I le saunoga a le Peresetene o taaloga a le Pasefika le alii mai Fiti ia Vidha Lakham na ia patipatia ai le Afioga i le Palemia o Samoa Tuilaepa Sailele Malielegaoi ona o le vave ona tali atu o Samoa e talimalo ai i taaloga nei a le Pasefika ina ua faaletonu ai le avanoa o Toga. Saunoa Lakham, a’o faagasolo ai le faiga o le tauofoga i le va o Samoa ma isi atunuu ae o le taimi lea ua leva ona tusi atu Samoa e aumai sa’o loa taaloga e faia i Samoa i le 2019.

Taua e Lakham, na faataunuu lava auala e pei ona masani ai mea nei o tauofoga ae ua leva ona iai i le fuafuaga a le komiti o taaloga nei a le Pasefika e tele le avanoa e talimalo ai Samoa i le 2019.

O le saunoaga lototele foi lea a le ofisa sili o taaloga nei a le Pasefika i Samoa nei le susuga ia Falefata Hele Matatia, afai lava e mananao le komiti o taaloga e logo mai nei ae talimalo ai Samoa i le aso a taeao, e sauni lava Samoa.

Taua e Falefata i se talanoaga ma le tatou nusipepa, o le luitau tele mo latou i le taimi lenei o tapenaga, o le taimi lea, ona ua latalata mai le taimi o taaloga ma e le toe maimauina foi se isi taimi i se isi vaega le aoga, ae ua ave uma le taimi e faataunuu uma ai tapenaga a le atunuu ina ia mautinoa le tulaga lelei o Samoa i le taimi e faagasolo ai taaloga nei a le Pasefika.

O le faailoilo mo taaloga nei a le Pasefia na tusia ma lomia e nisi o taulelea talavou e toalua mai Samoa nei le susuga ia Suivu Mah Yuen ma Fresh Irwin Kennar. Taua e Suivu i le tatou nusipepa e na’o le lua lava po na tusia ai le faailoilo lenei (logo) ona o le laititi ma le utiuti o le taimi na tuuina atu e le komiti o taaloga a le Pasefika i Samoa.

O le uiga o lenei faailoilo o loo faamatala mai ai le loto gatasitasi i le ata o le tanoa, ma le ata o vaega o felanulanuai i luga a’e o le tanoa o loo faamatala mai ai le omai faatasi ai o atumotu uma o le Pasefika i le taimi tonu o nei taaloga. E toatele nisi o i latou e pei ona tauofo ai i le tusia lea o le logo o taaloga nei a le Pasefika peitai na manumalo ai le faigauo lenei a Suivu Mah Yuen ma Fresh Irwin Kennar mo le faailoga tupe $2000.00.

O le mae’a ai ona faalauiloa o le logo lenei o taaloga a le Pasefika ona sosoo ai lea ma le fonotaga a sui o le Pasefika i le Aso Sa na tea nei e faataatia ai le tele o vaega o nei taaloga. E faamoemoe o le Aso Lua o le vaiaso lenei e faagasolo ai asiasiga i le tele o fale ma malae taalo o le a faaaogaina i le tausaga fou.

O le masina o Iulai o le tausaga fou ua faamoemoe Samoa e talimalo ai i taaloga lona 16 nei a le Pasefika, o le tausaga e 2007 le taimi mulimuli na talimalo ai Samoa i nei taaloga.