Ua logologoa tala aave i fatuga fou ma sikaili faaonapo nei ua aumai e tamaiti o le Nato Brothers i totonu o ana cd taitasi e pei ona fiafia i ai le toatele o le atunuu.
Ua le gata i totonu o Samoa ae ua faapena foi i le au faalogologo a le Radio Samoa 1593am i Aoteroa ma le lalolagi atoa. O le toatele o nisi e na ona faalogo ae lei vaai tino i nei alo pepese o le atunuu.
Ae o le taimi muamua o le Nato Brothers i laufanua o Niu Sila na matua faatumulia ai le falefaafiafia o le Fiafia Night Club i New Lynn i le mamalu o Samoa na agai atu ma fia mafuta ma vaai i tama o le Nato mai Salafai.
O le po o le Aso Toonai 18 o Oketopa sa faataunuuina ai lea faamoemoe, ma sa vaaia ai le maofa o le toatele o le au tafafao i le laiti o nei tamaiti ae o le maualuga o le tulaga ua oo iai le latou taumafai ma le saiiliili i le fatuina o pese ma le tuufaatasia o se MTV. Sa matua faafiafiaina le mamalu o Samoa sa auai i lenei faamoemoe. O tama fanau uma o le afioaga, o uo ma e masani faapea le aumalaga mai Safotu sa auai uma e lagolago le tatalaina o le cd ma le Mtv a tama o le Nato Brothers.
Sa faapea foi ona faatauina ai ma le ata ma le mtv i se tau pau i le $30.00 i le ata ma le cd. E 10 pese ua tuufaatasia i totonu o lenei cd ma ua faaigoina nei o le “I OI MATA O LOU OLA” o le uiga o lenei igoa ua faatatauina i le tuafafine e toatasi ae toaono tama. Ae na saunoa le tuaa a nei alo pepese o le atunuu, o le amataina o le taumafaiga a le fanau, o se polokalame sa faaalu i luga o le alaleo a le 2ap i Samoa i le tausaga 2005, e rap mai sau pese i le manava o galuega, sa faapea lea ona tusitusi ai loa e le tama ni pese ma faaleo mai e le alii o Nato i luga o lenei polokalame. Sa faamanuiaina le atalii i lenei tauvaga ma ofi atu ai loa i le sailia o le siamupini i le taimi o le Teuila i le tausaga lava lea 2005 ma manumalo ai.
O iina sa ae ai loa se lagona i le tama ma le tina ua tatau ona faia se cd pese a le fanau. E ui i le faigata ma le vaivai I le sailia o se seleni e pue ai se cd ae tagi lava i lima ma savali le tina e tuitui aua lava le manaoga o le faaaogaina o le taleni ua foai e le Atua i fanau. O le tama o le fesoasoani i le tusiaina o pese faatasi ai ma le alii matua o John ma Nato ao le tina o ia lea na te faasoasoaina seleni aua lava le faaauauina o le taumafaiga a o laua alo. O le pine faamau o le taumafaiga a le Nato Brothers mai le amataina o ana cd, o le pese o lo faaaogaina i le taimi o le faamalo i le augalulue i luga o le Radio Samoa, o se tasi o fatuga i le polokalame ao faagasolo i le tausaga 2005.
O le faaiuga o le masina nei e toe taliu atu ai le Nato Brothers i ona laufanua faatasi ai ma le aumalaga a le afioaga o Safotu, ma ua iai foi le faamoemoe o lea toe faaauauina le isi cd pea taunuu i fanua.
