Ua leva ona tuufesili le atunuu, poo afea o le a maua mai ai le Vaega 3 o le Ata Tifaga o le Matai. O le tala fiafia, o lea ua faailoa mai e le Pulega o le South Seas Pictures faapea foi le Samoa Video Center, o le Aso Toonai o le vaiaso nei 20 o Tesema, o le a amata faatauina atu ai i tua le Matai Part 3 mo le maimoaga a le atunuu.
O le Vaega 3 o le Matai e fitu masina na tuufaatasia ai, ma o le taimi muamua foi lea ua pueina ai ni vaega o lenei ata tifaga i totonu o Samoa. I le faaiuga o le Vaega 2, na faafuasei ai ona alu Safuiane i Samoa e aunoa ma le logoina o lona aiga, ona o le loto mafatia o le Alii, ina ua ia maua faamatalaga o le a faaipoipo atu Oketi o le tamaitai e toatasi ua alofa i ai i le Aoao o Ulisese, peitai e leai se silafia o Safuiane, e iai foi luitau o le a feagai ma ia i lona taunuu atu i Samoa, e lē gata i totonu o lona nuu, ae o totonu o lona lava aiga.
O loo faapea foi ona sosoo mai e le Vaega 3, le tala i le alii Aoao o Ulisese ma le fesili tele, pe taunuu le faaipoipoga lenei pe leai foi. O se Ata tifaga ua tapenaina lelei ina ia fetaui ma maimoaga a le aiga aota, aemaise vaitau nei o le Kirisimasi e potopoto faatasi ai Aiga aemaise o le maimoaga a tamā ma tina matutua ua nofo fale.
Ua tapenaina e le South Seas Pictures se faafiafiaga tele i le Aso Toonai nei, i le taulaga faatau o Magele mai le itula e 9.30 i le taeao, e patipatia ai le Kirisimasi ma faalauiloa ai le ata tifaga fou.
E valaau atu ai i le mamalu o le atunuu, aemaise paaga masani e afifio mai tatou te auai faatasi, o le a faafiafia ai le faaili lauiloa a le Pacific Love, faapea le tamaitai faafiafia lauiloa o Cindy of Samoa. E tele isi faafiafiaga o le a saunia, e iai foi meaalofa o le a tufatufaina i lea aso, ma faatauina atu ai i tua le ata tifaga fou o le Matai Part 3.
O lenei faamoemoe o se auala e faailoa atu ai le faafetai a le South Seas Pictures ma le Samoa Video Center i le mamalu o le atunuu i la outou lagolago. O le a mafai foi ona maua kopi o le Ata Tifaga fou i le Aso Toonai lava mai le Flea Maketi i Otara ma Magele faapea le Samoa Video Center i Otahuhu.
Mo nisi faamatalaga faamolemole faafesootai mai le 09-2764417 poo le 0223078324, poo le faafofoga ane foi i faasilasilaga a le Radio Samoa i aso taitasi.
Faamatalaga na tuuina mai
