Faalauiloa i Sini le Global Greengrants Fund

 Nisi o le mamalu o le Pasefika na afifio atu e lagolago le faamoemoe o le Global Greengrants na faia i Sini
Nisi o le mamalu o le Pasefika na afifio atu e lagolago le faamoemoe o le Global Greengrants na faia i Sini

O se tamalii iloga o Samoa i galuega tau Siosiomaga o le Pasefika le Afioga Toeolesulusulu Pose Salesa Cedric  Schuster na ia saunoa aloaia e faalauiloa i Sini le galuega ma matafaioi o la latou Faalapotopotoga saili manuia mo atunuu Pasefika, Ausetalia, Niu Sila lea e faaigoaina o le Global Greengrants Fund.

O lenei faalapotopotoga Tumaoti sa faavaeina i le tausaga 2002 ma ua fia miliona latou seleni sa o latou sailia mo galuega e puipui ai e atumotu laiti o latou siosiomaga mai aafiaga o le suiga o le tau i le siisii o le sami, tafega, vai aemaise afa, taina i lalo o laau mo laupapa, suauu masaa i ogasami o le Pasefika ma le anoanoai o isi galuega fesoasoani.

O le vaiaso atoa na faagasolo ai sa latou fonotaga ma isi faalapotopotoga aemaise amepasa o malo o loo fesoasoani. Mo le mamalu o atumotu o le Pasefika i Sini na auai atu se sui o Maori ia Annie Rogers Marshall, o sui o le Fono Aoao a Tagata Samoa afioga Faumuina Lisa Parker ma le Peresetene sa latou auai atu foi.

Na masii mai foi Canberra le afioga Muagututuia Laulu Winston Stanley ma le faletua ia Sarona. O le faletua ia Aggie Ah Dar ma Vicki mo lenei faamoemoe.

Faatoa silafia ai foi e tagata poloketi ua faatino i Ausetalia nei a le Global Greengrants e atoa le sefululima, tolusefulu i Papua Niu Kini, e fā i le Atu Kuki, fā le FSM.

O isi atumotu ua manuia mai lenei fesoasoani e aofia ai Fiti, Kiripati, Marshall  Island, Tuvalu, Mariana, Vanuatu, Solomona, Tonga, Micronesia, New Caledonia, Niu Sila, Niue, ma Palau.

I Samoa lava ia o afioaga ua maua atu fesoasoani tau tupe mo a latou polokalame o le siosiomaga e aofia ai Apia, Faleaseeela, Fasitootai, Matautu Falealili, Safaatoa, Salelologa, Vaimoso, Sapapalii, Sataoa, Satoalepai, Satuimalufilufi, Vailoa, Vaipouli, Leauvaa, Fusi Safata, Safotulafai, Uafato, Fogasavaii, Alafua, Matafaa, Falelima, Aleipata, Safata, ma Lano.

O le auga o lenei faamoemoe i Sini ia iloa e tagata Samoa le sao o lenei tautua mo a latou afioaga.

O sui o le Global Greengrants, Afioga Toeolesulusulu Cedric Schuster (Faatonu) Samoa, Maxine Anjiga (PNG), Willie Atu (Solomon Is), John Ericho (PNG), William Kostka (FSM), Margaret Rimoni-Yoshida (Samoa).