Faalauiloa i Kalaiesetete le ata tifaga, Sione’s Wedding 2

“E lei faigofie le sailiga o manatu e fafau ai le sosooga o le fau ma le fau” Oscar Kightley

O le naunautaiga sa i le alii tusitala lagolago ae o se tamafanau a le atunuu lauiloa i faasalalauga i televise ma ata tifaga, Oscar Kightley ina ia sosoo le ata tifaga o le Sione’s Wedding 2006 lea na matuā iloga le faamalieina ma le fiafia o tagata e maimoaina, peitai o le toe autalaina o se galuega lelei e ao ona siisii i se isi tulaga e sili atu.

O le aoauli o le Aso Gafua 16 Ianuari na maua ai se faatalanoaga a le Siufofoga o le Penina faapea le nusipepa o le Samoa Times ma sui o le ata tifaga Sione’s 2, le alii talenia o Oscar Kightley ma Shimpal Lelisi (Niue) i totonu o le ofisa o le leitio Plains FM 96.9. Na malaga mai i laua i Kalaiesetete mo le preview ma le faalauiloaina o le ata tifaga lauiloa lea ua tatala nei i Niu Sila aso 19 Ianuari.

Sa faapalopalo le faatalanoaga e uiga i le ata, ae na ta‘ua e Oscar e faapea, ina ua tasi le filifiliga  ma le pulega a le South Pacific Pictures ma ioeina le faaauauina o le ata tifaga, na ia lē toe solomuli ae faaoso loa auā a nofoai e tauau ina lē tau lau. Na laua faamatalaina ni nai vaega laiti o le ata, peitai o le ‘auga o aute o le toe faatasia ma opogi faatasi le latou mafutaga vavalalata, faatasi ai ma le la lapataiga, soo se faaaliga ua mae‘a ona maimoaina, aua ne‘i e faamatalaina i se tasi ae lelei lava le alu o le tagata ia e maimoa le ata.

E 15 masina le umi na tuufaatasia ai le faamoemoe e aofia ai le tusiaina, faatupeina ma le pueina o le ata seia oo i le taimi o le uluai maimoaina i fale tifaga ua iai nei, pe a faatusatusa i le 4 tausaga na tau faamaopoopo ai le Sione’s Wedding.

E lei faigata le toe logoina o alii ma tamaitai tuai o le ata ona e mafana tele le latou mafutaga, ta‘ua e Lelisi i le tusitala le mataalia o le latou vaega Duckrockers i taimi o le galuega ona e maua fua ai le taumafa ma e lei toe faatuai atu se isi. Na fesiligia pe iai se faamoemoe o se tusia o le Sione’s 3 i le lumanai, faaalia e Oscar atonu lava e oo i ai ma o se moemitiga e tulimatai.

Manatua o Oscar ma Shimpal, na fofoa atu i Kalaiesetete o la soifua tau musika, taleni act ma artists, pei ona galulue ai ma tamafanau Pos Mavaega ma Tania Muagututia i le Pacific Underground i Kalaiesetete.

Na malaga mai foi nei alo o le Pasefika e fesoasoani mo Kalaiesetete i taimi o aafiaga o le mafuie faatasi ma sailiga tupe mo le sunami i Samoa.