O le vaiaso fou lea ua fuafua e le Tautua Samoa e faalauiloa ai ana sui tauva ua iai i le taimi nei aemaise o le sauni atu ai i le faiga filifiliga a le atunuu ia Mati o le tausaga fou.
O se fuafuaga ua ta‘ua e le tasi o taitai o lenei Vaega Faaupufai, o le a silafia ai e le atunuu sui ua faamautu nei le tauva mai i Itumalo Faaalalafaga o le Palemene.
O lea ua ta‘ua e Lealailepule Rimoni Aiafi, ua tofu lava le itumalo faaalalafaga ma le sui o loo tauva mai ai, ma o le faamoemoe lea ina ia mafai ona maua uma sui tauva o le Tautua i itumalo uma.
O le aso e sosoo ai, le aso 15 o Tesema o le a faalauiloa ai Sui Tauva a le HRPP, le Vaega Faaupufai e Puipuia Aia Tatau a Tagata ina ia faamautu ai i latou o loo tauva.
Ua mae‘a ona faasalalau suafa o sui o loo iai nei ma sui ua ta‘ua o sui faaolioli, ma ua sili atu i le to‘a 100 i latou ua momoli atu i le HRPP mo lenei faamoemoe tele o le atunuu.
Ua iai la le faamuamua ua ave e le HRPP i ona sui o loo avea ma faipule i le taimi nei, ae o loo iai foi le faamoemoe o isi uma o le a tauva o sui Taitoatasi a le HRPP lava ia mo le Palemene.
Na ta‘ua e Lealailipule o loo tālia le taimi e oo atu ai sui o le Tumua‘i Tutusa mo le tuufaatasiga, lea ua mae‘a ona faalauiloa i le taimi nei.
O lea faato‘ā foi mai le Tautua mai lana sailiga seleni auā le faatinoga o sauniuniga mo le Faigapalota o le 2011.
Ua laga i Samoa le toatele o sui tauva aemaise e foliga mai e lē o iai lava ni aiaiga i sui e fia tausinio mo tofi maualuluga nei o le a filifili ai ta‘ita‘i o le atunuu. O le lisi o le ‘au faaolioli a le HRPP o loo aofia ai se tamalii, lea na sala faafalepuipui i le vaiaso na tea nei ina ua faamaonia lona faia o ni uiga matagā i se tamaitai e 24 tausaga le matua.
E fa tausaga lea ua faasala faafalepuipui ai Tuilagi Leo ona o lea mataupu. O lona uiga ua lē mafai nei ona toe tauva i le faiga palota.
E lē gata i lea o se isi alii na faaalia lona fia tauva i le palota lea ua faasala e le Sosaiete o Loia i Samoa, ona o se mataupu ua faamaonia ai le lē faia e lea alii o uiga ua tusa ai ma le tiute faaloia.
Sa faamaonia lona manaoga e fia tauva i le Palota ae e lei manino poo le ā tonu le Vaega Faaupufai na fuafua e tauva ai.
O loo iai foi se isi alii na momoli i le HRPP i le vaiaso na tea nei ona o le manaoga e fia tamoe mai Palauli i Sisifo, ae o lea na toe ave i tua le faamasinoga na tagi ai nisi o tina faasaga ia Sanele Katie i le taufaasese.
Na faatoese ma ua amata ona toe togitogi tupe a tina na tuuaia lenei alii i le Faamasinoga.
O se isi sui faipule na tulai mai foi i tausaga ua mavae i le Vaega Faaupufai lava a le HRPP o lea o le a tauva.
O le lagā o lenei mataupu ona ua fesiligia pe iai ni tulafono e tapu ai tagata ua aafia i faiga solitulafono mai le ofi atu i upufai o Malo. O le tali a le Ofisa Sili o Faigapalota, Tanuvasa Isitolo Lemisio, e leai ni tulafono.
Ona pau le tulaga e matauina, po ua mae‘a ona faasala le tagata ua aafia a o lei lesitala e tauva i le Palota. “Afai ua uma ona tuli lona faasalaga, o lona uiga ua faataga lava le tauva e aunoa ma se toe faalavelave mai o ia tulaga,” o se faamatalaga lea a le afioga Tanuvasa Isitolo Lemisio.
