Ia outou fetautalatalai i salamo, ma pese, ma siva faaleagaga, ia faaneenee atu ma pepese atu i le Alii i o outou loto. O le fuaitau lea na fai ma finagalo autu o le upu faamalosiau, na saunoa i ai le taitai matagaluega o le EFKS le susuga i le toeaina ia Aviti Etuale, i le taitaiina o le sauniga lotu puupuu na amata aloaia ai le tatalaina o le CD pese a Tele, i le Aso Toonai na tea nei.
Na faapupula i upu faamalosi a le faafeagaiga, le tele o aogā tāua ma malosiaga o le taleni pese pe a faaaogā mo se viiga o le Alii. Na ia faafetai ai i mātua o Tele, le afioga i le tiakono ia Tapunuuolenuu ma le faletua ia Ataata Faoagali, aemaise o tauaiga, mo le faatāuaina o le meaalofa o loo i le alo o si o latou aiga.
Na mae‘a le sauniga sosoo ai ma le tala otooto o le pueina o le faamoemoe o Tele, na saunoa i ai lona tamā le afioga ia Tapunuu, lea na ia faafetai faapitoa ai i ona mātua faaleagaga le susuga ia Aviti ma le faletua ia Sa, ona o le lagolago ma tatalo, aemaise lava le faamatuu atu e le faafeagaiga o nisi o pese na ia faaliliuina lea o loo peseina e Tele i le CD.
Na momoli foi lana faafetai i le susuga a Levae o le Levina Recording mo le fesoasoani ma le pueina o le CD. O le susuga ia Levae Levae o le Levina Recording o se tamalii ua lauiloa i tulimanu e fia ona o lana taleni pese ma le pue pese, ua fai o ia ma faamanuiaga mo le mamalu i le aai o Melepone.
Na mae‘a le saunoaga faafetai a le tamā ia Tapunuu, ma faagasolo ai pesepesega a le tamaitai e fitoitonu i ai le aso, le tamaitai o Tele Faoagali, faatasi ai ma sao matagofie o ausiva a alo ma fanau a le aiga ma nisi foi o uo.
I le mae‘a o nai pese ma nai siva, na alo ai loa i le taumafataga tele na tapenaina e le aigaalii, ma toe faagasolo ai pesepesega ma faafiafiaga. Na maua ai ma le avanoa o Tapunuu faapea le fofoga o le aso le susuga ia Faaitenuu Samiu Tupuola, e fofogaina ai le pese ua faaigoaina ai le CD o “Lo‘u Faauuina”.
Na maua foi le avanoa e sausaunoa ai le lupe faalele a si o latou aiga le susuga i le faafeagaiga ia Iosefa na malaga mai Niu Sila, faatasi ai foi ma sasaunoaga faa-Samoa a nisi o tupu ma tamalii o le atunuu na faaalia ai lo latou valevalealofa.
O le fofoga o Niumaleoa Kosema na tu tootoo mo le paia i le aigaalii auā Samoa na potopoto aemaise o faaaloaloga mo le Aufaigaluega paia. Sa talifuaitau le fetalaiga ia Masinamua Faamanatu Faafili e fai ma sui o le valaaulia, ma faaiuina ai i le Lota Nuu ma le tatalo. Faalautele e le Atua lau Taleni Tele, ma saga tele ni CD e faamanūina ai lana afio.
