Na faatumulia le mamalu o le atunuu i le pitonuu o Marsden i le po o le Aso Toonai na tea nei, i le tatalaina o le CD a le faletua ua iloga i le musika, o Gaylene Filoa Akelly. Sa auai faatasi mai ai ma le nofoaalo e toalima mai Niu Sila.
O le fofoga o le po o le susuga ia Michael McCarthy mai Niu Sila. Na sioa ma mālū i le faafofoga a le aofia a o toe lagiina e le faletua ia Gaylene ma ona alo pese o lana CD, o viiviiga lava o le Atua
Sa faamanuiaina foi le faafofogaaga e ala i se upu timai sa faamalosi ai lana auauna ia Ps Solomona Chan. Na faia e le alo tamaitai o Gaylene se talaaga i le soifua o si ona tina i le suia e le Atua ma faaaogā le siufofoga e lagiina ai viiga o le Atua, auā o se tamaitai foi na iloga ona faamalieina ai le toatele i le mālie o lona siufofoga a o pese ai i le faaili a le “Faatalatala se Mata e Emo” mai le alalafaga o Saleaumua i Aleipata.
