E lē toe tau faailoaina se tasi o tamalii o le atunuu ua lauiloa i lana taleni o le musika poo le pese ma faafiafia le susuga Lealaitagomoa Asuao Felise Mikaele, auā o soo se vaipanoa o le lalolagi o loo alala ma aumau ai soo se tagata Samoa ua oo i ai nisi o ana faafiafiaga.
Ua mautinoa foi o le taimi lava e faalogoina ai leo o kitara ma isi mea fai faaaili i pesepesega i luga o leitio e vave lava ona mateia e tagata o fatuga a lea tamalii.
Peitai e ui ina iloga se tautua a le susuga Lealaitagomoa Asuao Felise Mikaele i le musika ae ua ia faailoa mai i le tusitala, ua ia manatu e faia ni suiga fou i ana fatuga ina ia suia ai foi le faafofoga a le atunuu.
“Ua lagona lava le vaivai o lenei ua 64 tausaga, ae lē mafai lava le fia faaaogāina pea o le meaalofa ua foaina fua mai le Atua e tautua ai aiga, le lotu ma Samoa. O le vaiaso nei e tatala ai i Ueligitone le CD fou Volume 28 ua Faaigoaina “Zumba” ma le DVD o ata fou ua faaigoaina “Le Afi”.
Ua faaigoa lenei CD 28 o le “Zumba” ona o se pese fou i le CD o loo matuā lagolagoina ai Siva Faamalosi tino lea ua molimauina le matuā mafuli i ai o le fiafia o tagata Samoa o loo i Samoa ma soo se atunuu o le lalolagi, i le ‘Au matutua aemaise le tupulaga talavou mo le tausia o le soifua maloloina, e pei ona lagolagoina e le Malo. E lē gata i lea, ae o le tāua mo le itupa o tamaitai i le vave ona toe talavou ma lamolemole ai foliga e pei a tau manumi pe a toe matafi pauta ma kulimi valimata. O loo iai foi i lenei CD le pese “Siamupini o Samoa” o loo faamalo ma faafetaia ai Samoa i le Finau ma le saili malo lea ua numera tasi ai i le Lalolagi i le faatāuaina lea o fale lē ta‘ua, o se matatia e faigata ona toe ausia e se isi atunuu, e pei ona iai le maa faamanatu o loo i tua o le Ofisa o Turisi i le eleele fou.
O le DVD, o loo aofia ai ma le ata “Matai o le Vaveao” “Come onto Savai‘i” ma isi. Sa pueina lenei DVD i Samoa, Niu Sila, Amerika, Ausetalia ma Tutuila.
O loo faaaogāina i lenei CD ma le DVD metotia faatekonolosi fou e igoa o le DSM poo le Digital Scrambling Macrovision lea e faaleagaina faila faacomputer (Digital Files) o pese ma ata i le taimi e taumafai ai e kopi, ona ta atu lea o kopi, e gogolo ma motumotu pese ma ata.
O se faiga o loo fa’amalosia e le Apra/Amcos, le Sosaiete e lesitala ai Copyright Ownership poo pule o meatotino o pese ma ata a Niu Sila, Ausetalia ma Asia le (Australasian Mechanical Copyright Owner Society.
“E taugata nei faiga fou, ae ua taumafai lava i se faiga e taofi ai le kopi e nisi o nei mea ma toe faatau atu e faavalea ai le mamalu o le atunuu aemaise le ‘au faatau”. A mae‘a le Laumua o le Afa fulifao le Hurricanes i Ueligitone ona faasolo atu foi lea i le aai o le Blues i Aukilani, ma isi atunuu.
