Ole vaiaso atoa lenei oloo faagasolo ai se polokalame ua faaigoaina ole Whanau Fun, poo se isi ona faauigaina e faapea, ole faamoemoe ina ia auai le Aiga ile faaleleia poo le puipuia o tagata ua afaina i lea faama’i o taaloga faitupe poo petipetiga.
Ole tele o taimi e faapea tatou aiga e na’o fomai ma ē ua uma ona a’oa’oina e mafai ona auala mai ai se fesoasoani, a’o lea ua iloa nei i suesuega a alii fomai, e telē le sao o tatou aiga.
Ona ole talitonuga e faapea afai ae auai le tagata Samoa poo se tagata i galuegafai a lona aiga poo ni faalavelave, poo le faasoa foi i meaai i nisi o aiga poo tagata, o auala la ia e ono mafai ona taofia ai le tagata mai faafitauli lea ole taalo i taaloga faitupe poo petipetiga.
E eseese la auala e mafai ona faatinoina ele tagata e ono kiliva ai le feau e taofia ai tatou mai nei taaloga.
Ole mea moni lava, e le faapea ole taumafai e taofi le tagata mai taaloga faitupe poo petipetiga, ae o auala ma le fesoasoani ia iloa ai ele tagata soifua ona nofouta ma faaeteete ile fiafia e taalo i petipetiga.
Ole taalo i taaloga faitupe ose mea ua faafiafia ai le toatele o tatou tagata, ae ole faalavelave ole matele i taaloga faitupe e ono afaina ai le tagata, ma ua foliga mai ua fai ma ana masani po ua lē mafai ona toe tuua pe musu foi e misi le taalo i nei taaloga ile tele o taimi ma aso uma.
Ole vaiaso atoa lenei oloo faatinoina ai nisi o a latou polokalame i nofoaga taitasi ua uma ona atofaina e faatinoina ai lenei faamoemoe, e pei ole nofoaga i Massey ile itu i Sisifo o Aukilani i Berean Fellowship Sessions lea sa faatinoina ai le latou polokalame muamua, ole Aso Tofi lea na see mai ai ile taulaga faatau i Magele ma faasoa ai nisi o polokalame auā le faamalosiau ole polokalame ile mamalu ole atunuu ina ia alofia le fiafia i taaloga faitupe.
O Manukau lea ua toe tolo atu i tua ile aso 16 o Setema ona ole tulaga faaletonu ole tau i timuga, ae faatinoina lava le polokalame i Spring Breeze ile Mall i Manukau.
E ese mai nei polokalame oloo faagasolo ma faatinoina i totonu o pitonuu taitasi ile galuega ale afioga ia Papalii Fuiavailili Ala’ilima e ala i ana a’oa’oga faatino ile itu i Sisifo e fesoasoani ma faasoa ai ile mamalu ole atunuu ina ia nofouta ai ile tele ole tupe alu i taaloga faitupe.
O nei lapataiga uma oloo mafai ona latou talatalanoa iai i tagata lautele, ua le gata i tagata Samoa a’o tagata lautele ole Pasefika ile faasoaina ma le paketiina ole tupe maua, ina ia aua ne’i safa le aiga ile faasoa ona ole malosi ole taalo faitupe poo petipetiga.
O nisi o kamupani oloo mafai ona fesoasoani i lenei polokalame, Ignites Colleges, Diabetes, Arthritis, Fono, Southsea’s Healthcare, Vaka Tautua, Vaiola Pacific is Budget, Raukura Te Oho Ake Youth, SAFVPN (Safer Aotearoa Family Violence Prevention Network), Alliance Health Plus Nurse Hapai, Salvation, Election Team, Raukura o Tainui (Te Oho Ake Team -Youth) Water Company, Pasifika Ola Lelei Services, Gambling Services, PGF, Public Health Team – South Sea’s Healthcare.
Saunoa le afioga ia Papalii Fuiavailili Ala’ilima i lana tuualalo mo le mamalu ole atunuu o Samoa aemaise ole Pasefika atoa, afai oloo aafia i tatou i lea tulaga ole malosi ole taalo i taaloga faitupe e ono afaina ai le aiga, ona aua lea ona e auai ise nofoaga e ono faaosoosoina ai oe i lea faafitauli, ae lelei lava lou auai i mea faaleaiga.
E iai nisi ole atunuu oloo latou iloa oloo afaina i faafitauli nei ae ole mafuaga ele mafai ona alu e saili se fesoasoani.
Ole talitonuga ole afioga ia Papalii Fuiavailili ua fai mai nisi o tagata, ua fiu ile tele o mea e fai ma faalavelave i totonu o aiga, ae leiloa, e moi o mea oloo auai ai tatou ae o mea oloo mafai ona tatou fuafuaina ma leai ai ni faafitauli e ono tulai mai, a’o lea foi oloo mafai ona galulue faatasi ai le auaiga atoa ma olo maua ai le fesoasoani ile tasi ile tasi.
Ole eseesega la lea ole auai i lou aiga ile tele o faalavelave ma lou auai i taaloga faitupe. Ua talafeauga lelei lenei faalauiloa ma le vaiaso oloo faatāuaina ai le gagana Tonga ma ua tele ai ina faaaogāina fanau aoga o aoga laiti a Tonga e fesoasoani i nei polokalame i nofoaga oloo faatinoina ai, e pei o Magele.
