Faalauiloa aloaia Anavatau ale Labour Party i Aukilani i Saute

Faipule a Magele, Aupito Sua William Sio, Jacinda Ardern ma Jenny Salesa ma sui oloo lagolagoina e Labour
Faipule a Magele, Aupito Sua William Sio, Jacinda Ardern ma Jenny Salesa ma sui oloo lagolagoina e Labour

E leai lava se isi mea na lolofi atu ai le mamalu ole atunuu oloo lagolagoina le Pati ole Labour ile taeao ole Aso Toonai ua mavae i totonu ole taulaga faatau o Magele, ole vaega muamua ole fia vaai tino ile tamaitai o Jacinda Ardern ua avea nei ma taitai ole Labour Party, ma le vaega lona 2, ole fia faalogologo poo a ni vaega ole a fofola mai ele taitai e fesoasoani ai ile oi male taugata ole soifuaga o Niu Sila lea ua iai nei.  Ua taeao ese lea taeao i totonu o Magele ile lanu mumu faasolo atoa o toniga ole atunuu e faailoa atu ile taitai ole Labour ma sui faipule ole Labour sa auai, e 100% lo latou lagolagoina o lea vaega faaupu fai e le atunuu.

E eseese atunuu, o lanu ma gagana ae ua tasi tagata uma i lea aso ona ole galulue faatasi ile lagolagoina ole Labour Party. Ua poloka faasolo atoa totonu ole taulaga faatau o Magele ua le mafai ona feoai le au fai faatau ona ole lolofi atu o tagata e fia auai ile faamoemoe taua.

Ua faailoa le agaga ole fiafia o tagata eseese ile sisii i luga o fu’a ma valaau ile Labour ina ua fofola mai nisi o vaega o anavatau oloo fuafua iai le Pati ale Labour e faatunuu mole mamalu ole atunuu aemaise lava i tagata Pasifika.

E ono ni vaega taua ua faamanino mai ele taitai mo le lelei o tagata Pasifika i totonu o Niu Sila.

Oloo taumafai e faataua le faaaogaina o Gagana e lima mai i atunuu ole Pasifika i totonu o Niu Sila, e aofia ai Samoa, Tonga, Niue, Cook Island ma Tokelau.

Taumafai e lagolagoina le faatuina o se ala ata TV Pasifika, ina ia mautinoa ai oloo alualu i luma faasalalauga ma avanoa oloo maua, mo polokalame a le Paefika i luga o TV.

Saunoaga ale taitai ale Labour, Jacinda Ardern
Saunoaga ale taitai ale Labour, Jacinda Ardern

Taumafai e faatuina se auaunaga tau femalagaina (immigration)  e fesoasoani ai ma amanai’a tagata ma motu o le Pasefika ua afaina ona o suiga o le tau.

Amata se faalapotopotoga fou Pasifika latou te faia fuafuaga mamao ale Pasifika i totonu o Niu Sila;

Manaomia ni teuga tupe mo tupulaga talavou Pasifika ina ia mafai ona ausia ai o latou faamoemoega ma maua ai lo latou lumanai manuia.

Ia faamalosia ma saga faaalualu pea i luma le taua ole mafutaga faipaaga a atunuu ole Pasifika ma Niu Sila.

Mo le lelei o Niu Sila, e talitonu foi le Labour Party e tatau foi ona lelei tagata Pasifika. O fuafuaga faataatitia mamao ale Labour, e mo tagata Pasifika, aua o latou aiga ina ia taunuu ise taunuuga lelei ma ia faamanuiaina ise soo se vaega i totonu o Niu Sila ma ia maua se lumani manuia.

Ole lumanai o Niu Sila e mausali le sootaga mole ola lelei, o faamanuiaga, ole taitaiga ole malosi o tagata ole Pasifika. Ele gata ile vave ole faatuputupulaia ole faitau aofai ole numera o tagata Pasifika i totonu o Niu Sila, ae ole vave foi ole faatuputupulaia ole augatupulaga talavou, o i latou ia olea faia galuega mole lumanai i totonu o Niu Sila.

Ua fausia foi e tagata Pasifika ni komuniti malolosi ma tumau, faapea aiga i totonu o Niu Sila, ole loloto foi lena male sao o aiga ma tagata ole Pasifika i totonu o lenei atunuu, e ala lea i galuega, taaloga, taleni faapitoa, aoaoga, ekalesia, totonu ole malo, pisinisi ma faigapolokiki, ua fai lea ma auala e toe fausia ai se faiga fou i totonu o Niu Sila.

E maualuga i manatu ma lagona o tagata Samoa male Pasifika lea feiloaiga ile Aso Toanai, pea fuafua ile mamalu male matagofie o sauniuniga ma tapenaga na alo iai sui faipule ma tagata lagolago ole Labour.

Ua le gata i foliga fiafia o tama ma tina matutu seia oo lava i tupulaga talavou ua faaalia ae o faafiafiaga eseese mai le Pasifika na faafiafiaina le mamalu ole atunuu, e pei ole ausiva mai Tonga male ausiva ale Tatau Dance Group.

Ole faipule o Magele ia Aupito Su’a William Sio sa fai ma sui o faipule ole Labour mai itumalo sa auai e faafeiloaia le mamalu ole atunuu faatasi ai male lagolago sua ale susuga ia Alfred Filipaina. Ole afioga ia Father Michael Endemann sa taitaiina le polokalame ile tatalo ma faagasolo ai loa faafiafiaga ma faaiu ai ile saunoaga ale taitai ole Labour Party.