O se fetauiga mataina i le maimoa a tagata pe tusa ma le 23,500 i le malae taalo o le AMI Stadium i le va o au malolosi e lua, Blues mai Aukilani ma le Crusaders i le taamilosaga lona fa o le Supa 14, lea na faatoa mautinoa ai e le Blues, le malolosi o faalata ma ana autau ina ua kolosi faalua e le laina i tua le laina sikoa ma manumalo ai Crusaders i le 33-20 i le afiafi o le Aso Toonai ua mavae nei.
Ina ua oo i le malologa o le ‘afa, sa matua tau fai tutusa le pupusa o au o lua, ona o sala uma sa aaina e Carter ma le alii numera 10 o Brett mai Aukilani, lea sa taalo muamua mo Crusaders, ae sa faatalitali tuagalu pea i tua o Carter, ma tulai mai le sikoa vavalalata 16 -15.
O le 15 minute i le afa lona lua, na sikoa ai Crotty mai se pasiga na oso faalava ane, ma pei o i tonu na tau amata ai le faaletonu o le Blues, ma faasolo atu ai ina oso le toto maualuga ina ua kolosi faafuasei e le alii o Fruean, numera 13 le laina sikoa, o ia o se tama fanau a le atunuu faatoa sainia lana konekarate mai Ueligitone, ma faapena ona a‘ea‘e atu ai le maualuga o le fiva i le 33-15.
O nai sikoa faatotope ia a le Crusaders na tau tea ai si faanenefu mai le vavalalata o ai lea sa iai i le taimi o le malologa muamua, ma ua ataata mai ai le manumalo o le au tele a Canterbury.
O se taaloga matagofie i le maimoa i le va o alii numera 10 e toalua aua o le uso tuofe sa taufai taaalo uma mo le Crusaders i tausaga ua mavae, ia ae onosai ia Blues e fai lava sina maneta teisi o Carter.
I se saunoaga a le alii faiaoga o Pat Lam, na ia ta‘ua ai lona agaga fiafia pea i lana au malosi mai Aukilani, o loo alualu pea i luma le taumafai o tama taalo ae o nai masei laiti lava (basics) e le o faatauaina e ao ona toe autilotilo i ai i le lumanai.
E to‘afa alo Samoa o le atunuu o loo taaalo ai mo le Crusaders, o se fiafiaga foi lea o le loto ona sa vaaia lava le laumata fiafia o tama taalo ina ua feiloai atu i alo Samoa mai Aukilani, e ui lava ina malolo ae o le malolo lava a le tamalii.
O se tasi o itu sa maitauina ma manaia i le matamata o le tau fai malolosi o le puipui mai a ‘au e lua, ma tulai mai ai o se taua i le va o le motu i matu ma le Motu i Saute, ae toe timata maia le upega Aukilani mo le lumanai aua a siisii le tai, e siisii foi le vaa folau.
Ua faasauni atu nei le Crusaders e malaga i Hemilitone mo le la fetauiga ma alii sili (Chiefs) mai Waikato i le la taaloga o le taamilosaga lona lima, e faia lea i le Aso Faraile a sau nei, aso 12 Mati 2010 i le Waikato Stadium.
