Faaiuina manuia Revival, Ekalesia Full Gospel Pentecostal, Kelston

Ia naunau pea ma ia galulue faatasi ma le Paia o le Atua, o se tasi lea o feau faamanatu o le Faaolaola agaga a le Ekalesia Penetekoso o le atoatoa o le Tala Lelei i Kelston, sa faataunuuina i le faaiuga o le vaiaso ua tuanai atu 21-22 Setema.
O le Failauga faapitoa o le Susuga Pastor Alofa & Seepa Noa mai le Faith & Life Changing Ministry mai Christchurch. Tele mea matagofie sa vaaia i lenei faamoemoe tāua e lē gata i le aao faivavega faamalolo o le Atua, ae o le toe faamalosia o aiga taitasi aemaise o nai fanau aooga sa auai.
Sa auai faatasi nisi o faafeagaiga aemaise nisi o Ekalesia o le Penetekoso atoatoa o le Tala Lelei e talisapaia nei faamanuiaga faaleagaga. Sa auai ai foi le susuga i le faafeagaiga ia Kuki Aloalii ma faasoa foi sona agaga faamalosiau i le Ekalesia i Kelston. O le Ekalesia i Kelston o loo tausia e le susuga i le faafeagaiga ia Pastor Tavita & Ruta Tavu‘i Tavita ma ua savalia nei i le 4 tausaga talu ona amataina le galuega.