E ui ina sa tele luitau na faalavelave i le folauga a le ofisa faasalalau a le Fofoga o le Saolotoga i le 2014, ae na maualuga le viiga o le Atua na faafoi i la latou fiafia faaiu o le tausaga, ona ua agiagia maualuga le manumalo na fofoa mai le onosai ma le faapalepale i le tautua atunuu.
O le maota o le afioga i le faatonu le afioga ia Taefu Siumalae Silao ma le faletua ia Maanaima na aofia potopoto ai le ofisa atoa ma o latou faletua ma tausi e faamanatu le agaga o le Kerisimasi ma faamavae atu i le tausaga 2014.
Sa auai le susuga i le faafeagaiga ia Sala Paulo ma le faletua ia Julie, tina matua ia Lemalu Mesepa, susuga ia Ene Gafoi (Tufugauli) tofa ia Luai Toni ma le tausi ia Evelina Tuimauga, susuga ia Mailata, susuga ia Tootoo ma le tausi ia Peleiupu Siania, susuga ia Peter Tuiletufuga ma Maria Tuua.
Ia sagai ane ai o le tai mo lenei Tausaga Fou, maua sa tou tofa faaleatunuu ma sa tou tofa faale-Atua auā tofi ma tiute tautua mo Samoa i luga o le ea.
