Ua toe nei o se aga ona faamavae atu foi lea i lenei tausaga 2014, ma ua faapena ai foi ona vevesi ma vavao matagaluega, o falefaigaluega, o faalapotopotoga ma mafutaga eseese i le faataunuuina ma le faamanatuina o feau ma galuega sa feagai ai o lenei tausaga.
O le afiafi o le Aso Toonai na faia ai se mafutaga matagofie na saunia ma tapenaina lelei e le laulau ma taitai o le mafutaga a le “ZUMBA CLUB” i totonu o le aulotu EFKS i Manurewa.
O le mafutaga lenei sa matuā faamamafaina ai ma faatāuaina le faia o ni faamalositino; sa faaaogāina ai le siva i taga faazumba sa fesoasoani ai i tagata lautele ina ia mafai ona faatāua le soifua maloloina lelei.
O le faamanatu ma le logologo puialiiina o tagata Pasifika o loo alalaga ai pea foi le aufaigaluega a le leitio Samoa, lea foi sa faaauauina lava e lenei kalapu poo le mafutaga lenei, lea la ua faaiuina ai loa i le latou mafutaga sa faailoaina ai le loto faafetai ma le agaga fiafia tele o le laulau, ona ua vaaia lava le lalelei ma le momosi o foliga o sui uma na latou faaaogāina lenei polokalame tāua, aemaise foi o le faaauauina (maintain) pea o le faatāua o le tausami i meataumafa paleni lelei mo le tausia lava o le soifua maloloina.
O le susuga i le aoao fesoasoani o Anelusi Mila sa na taitaiina le lotu faafetai na faamua ai mea i Matautusa ma faafoi ai le viiga i le Atua ona ua mae‘a feau ma galuega lelei e ala i lenei polokalame i le manuia ma le fiafia.
O lea aso foi sa luagia ai le faatāuaina o galuega o le 2014 ma le faamanatuina o le aso soifua o le tamā ia Tunumafono Fiataui ma faapena lava ona matagofie atili ai le mafutaga auā sa maitauina le laufofoga fiafia o sui uma na mafai ona auai atu i lea foi faamoemoe tāua.
Ua faaiuina nei la polokalame masani a le ZUMBA CLUB o lenei tausaga ae e iai le faamoemoe e faaauauina pea le faataunuuina o le faamalositino ina ia aua ne‘i motusia ai le fesoasoani pea mo tagata lautele ina ia mafai ona tausia le soifua laulelei i le tino aemaise lava ona o lea ua i le vaitau e soona taumamafa ai i le felanulanuai ma le matalasi o le mau meaai eseese ma lē mafai ai ona faatāua le faapaleniina o le tausami, ma toe faaleaogaina ai le fita ma le naunautaiga sa gapatia ai i le tausaga atoa.
O lenei polokalame ua fesootai ma faipaaga lelei ma le mafutaga a le “LOTOMALIE” i totonu o le Herbal Life a Manurewa ma ua faafaigofie ai lava ona faaauaua le faataunuuina o faamalositino aemaise o le faamalosia o le ola naunau ma le filiga e tausia lelei le soifua maloloina mai lava i le fili malosi lea o le soona taumafa i meaai lē paleni.
O le saunoaga a le susuga i le failautusi le susuga Tootoovao Toleafoa Tupou na ia toe lagaina ai, o lona talitonuga o ni polokalame tāua tele o loo faatinoina e nei mafutaga ma e tatau lava ona faaauau pea ina ia faamalosia le agai mai i ai o tagata lautele latou te faaaogāina e tausisia ai le faaitiitia o le tino puta, aemaise ia aoaoina ai foi mo le silafia ona faaaogāina ma tausia le taumamafa i meaai paleni lelei.
