Faaiuina 3 aso mafutaga faaolaola agaga Weymoth Full Gospel

O le faaiuga o le vaiaso ua tuanai na faataunuuina ai mafutaga faaolaola agaga a le ekalesia First Samoa Full Gospel Pentecostal Church i Weymouth.

O le susuga i le faafeagaiga ia Apisaloma ma le faletua ia Taumaoe Sea o loo tausia le galuega a le Atua i Weymouth. O le failauga faapitoa o le susuga ia Rev. Elder Dr. Paul Eteuati ma le faletua ia Leilani na malaga mamao mai lava mai le malo tele o Amerika e faataunuuina lenei faamoemoe tāua.

E matagofie le upu folafola a le Atua sa laugaina e lana auauna ma le feau autu o nei mafutaga ia Malosi le faatuatua, Ia toa le faatuatua, atoa ma le uiga moni o le faatuatua tatou te soifua ma ola ai i aso uma.

E toatele nisi o faafeagaiga mai isi ekalesia sa auai faatasi faapea le loaloa o si o tatou atunuu sa auai ma tufi faatasi faamanuiaga sasaa mai le Atua.