O le vaitau lava lenei o le faagasologa o le faaiuga o galuega aemaise o laugatogi ma pati a faalapotopotoga e faafetaia ai le faagasologa o galuegafai sa feagai ai i le tausaga.
E faapena la le tulaga na oo i ai le Kalapu o le Iuni Lakapi a le Aukilani Samoa, e tusa ma taaloga sa feagai ai, lea la ua faaiuina ai i le laugatogi na faia i le po o le Aso Faraile. Na matagofie le vaaiga i le tele ma le lava tapena o le laulau tofia i vaega uma na faatinoina auā le faatofutofusia o vaega sa faaautū i ai faailoga taitasi. Peitai, o saunoaga a sui o le laulau na atagai ai ma faaalia mai ai le faanoanoa tele ona o le toatele o i latou o tama taaalo o au taitasi aemaise foi o tagata lautele o ē sa valaaulia ma faasafua atu i ai tickets, sa lei mafai ona lava ane i le faamoemoe o lea po. Peitai e lei tuua ai le faataunuuina pea o le laugatogi, ma o se faamoemoe sa matagofie tele foi lona faatinoina.
Na taitaia ma faamuamua pea foi mea i Matautusa e pei o lea upu, na saunia ai e le susuga ia Rev. Ionatana Lefale se upu na tomatauina ai ‘au uma ina ua faaiuina manuia lenei tausaga, aemaise foi o le toe tomanatu pea mo le lumanai ma le faaauauina o lenei taamilosaga.
O le afioga i le peresitene Aiolupotea John Roach sa saunoa mo le saga faafetaia atili pea o tulaga uma. Na ia ta‘ua o le sini lava ma le faamoemoe autū o lenei faalapotopotoga o le fia atinaeina pea o le taleni lakapi a alo ma fanau o Samoa aemaise ia maua pea mafutaga mafanafana o alo ma tamafanau a Samoa i totonu o tulaga tau taaloga ma le faaauauina pea o le soifua auauna e ala i lea foi vaega o taaloga. Ia tele ni faailoga sa tufatufaina ma faamanuiaina ai nisi o tama taaalo aemaise o vaega uma e tusa ma polokalame sa faagasolo a le kalapu.
• Laufali o le tausaga: Mr. John Kenelly
• Junior Player o le tausaga: Solofa Silipa (Reds)
• Manager o le tausaga: Rimoni
• Coach o le tausaga: Mr. Monty (Tauaana)
• Most improved team: Lupe o le Soaga
(Maagiagi)
• Seventh player o le tausaga: Jamie (Saleimoa)
• Team o le tausaga: Apia Maroons
• Player o le tausaga: Talileasuasu (Tauaana)
• Team supporter o le tausaga: Lupe o le Vaomaoa
(Letoga Vaitele)
• Committee member o le tausaga:Sema
• Delegate o le tausaga: Mr. Tony & Mr. Eli
• Siamupini o le tausaga: Tama o le Tauaana
(Falelatai)
O le ‘au malosi la mai Falelatai le Tama o le Tauaana lea ua sola nei ma le ipu ma le talita o le taamilosaga o lenei tausaga 2010.
Nisi o sui o le ‘au malosi a le Tauaana sa latou taliaina ma le faafetai le tauaaoina atu o le latou ipu ma le talita o lo latou manuumalo i lenei tausaga 2010
Susuga Rev. Ionatana Lefale ma le Komiti Faafoe, sauni mo le tauaaoina atu o faailoga mo i latou sa faamanuiaina i le taamilosaga lakapi o lenei tausaga
