Ua taualuga le polokalame a le CA, poo le Autalavou mo Keriso, atoa ai ma le Aoga Aso Sa a le Ekalesia Faapotopotoga a le Atua i Niu Sila mo lenei tausaga 2012.
O se fuafuaga sa faapitoa lava mo le faitauina ma le suesueina o le Tusi Paia i ona Tusi ma mataupu taitasi e pei ona faatulagaina e le komiti faafoe.
O le Tusi o Korinito sa taulai i ai faitauga tusi o lenei tausaga, ma faia ai loa le suega tele mo Niu Sila atoa, e pei ona sa faataunuuina i le afiafi o le Aso Faraile, aso 19 o Oketopa na tea nei, sosoo ai ma le laugatogi tuufaatasi i le Aso Sa, aso 21 o Oketopa lava.
O se tasi lea o faamoemoe tumau ma ua faamauina i le kalena faaletausaga ma polokalame faagasolo a le Ekalesia Aoao, e pei ona amata mai i le tele o tausaga ua mavae. O se fuafuaga ua vaaia ma faamaonia le fua mai e ala i le maitauina ma le faalauteleina o le silafia o soo se tagata e auai, ma ua fesoasoani tele i le soifua faaleagaga o tagata lotu taitoatasi ma fanau, i totonu o aulotu taitasi. O se tasi lea o vaega o le Tofamamao (Vision) a le susuga i le Toeaina Malolo Manumalo ia Samani Pulepule a o avea ma Taitai Aoao o le galuega i Niu Sila ma le lalolagi atoa, i le tele o tausaga ua tuanai.
Sa amata na o tagata matutua, peitai na toe faaopoopo i ai ma le tapenaina o fanau laiti ma le autalavou, e auai faatasi ma le aumatutua i lea lava fuafuaga tāua. O le autu ma le faamoemoe mo le fanau laiti ma talavou, ina ia faamasani e tago ma susue le Tusi Paia, ma faitau i ai. Ia avea o se vaega tāua i le tuputupu a‘e o le tama ma le teine i totonu o aiga ma le ekalesia.
Ia maua le malamalama ma ia saga mauaa ai le ola faatuatua ina ia matua ma manatuainaina pea i le gasologa o le soifuaga.
O loo faaauauina pea lea polokalame tāua e le Komiti o le Autalavou i lalo o le faamalumaluga a le Komiti Faafoe o le Matagaluega a Niu Sila.
E lua vaega sa vaevaeina i ai le fanau laiti poo le Aoga Aso Sa, e amata mai le lima tausaga seia oo i le 13 ma le 14 tausaga le matutua. A o le 15 agai i le 21, sa faatulagaina foi le latou suega i lalo lava o le CA, ae ese mai i tagata matutua.
O le faaiuga na taunuu i ai le suega a le A ma le B a le Aoga Aso Sa i Aukilani lava ia, ona talu ai e lomia lenei lipoti e lei maua se faaiuga mai isi vaega i Niu Sila atoa. I Aukilani e to‘a 68 tamaiti na sue i le vaega A, ae 71 tamaiti o le vaega B, mai le aofai o aulotu e 21. O le 71 o tamaiti na sue o le A, e to‘a 63 i latou na ausia togi e pasi ai, ae toavalu e lei manuia. O le B, e to‘a 68 na sue, e to‘a 62 na pasi, ae na o le toaono sa lē ausia togi e pasi ai. O le tulaga 17 agai i le tulaga muamua, sa mafai ona faatofusia uma i faailoga sa saunia ma tapenaina e le komiti faafoe.
O le saunoaga faapitoa a le susuga ia Pastor Luaiva sa nafa ma suega a le fanau, sa ia molimauina ai le tulaga lelei, aemaise o le faamaoniaina o le aogā ma le tāua o suega mo le fanau, ona o loo faatupulaia pea le faitau aofai o tamaiti e sue i suega i tausaga taitasi.
