E toatolu ni alii o loo i se tulaga tigaina lava ona o se faalavelave tau taavale na tulai mai i Vailoa i Faleata i le faaiuga o le vaiaso na tea nei.
O lea faalavelave na tulai mai ina ua agai ese mai i le auala tele se loli o loo la‘uina oloa poo se tiliva a le kamupani o le Ah Liki Wholesale. Na agai mai i Sisifo lea taavale e fuafua e malaga atu i le taulaga e foliga mai ua tau faaiuiu a latou galuega o le Aso Toonai, peitai na sē i tua ma alu atu sa‘o lava so‘a se pusa la‘u uta e tumu i oloa o se faleoloa o Saina i Vailoa Faleata.
Na matuā malepe le pusa la‘u oloa ma sau i fafo le tele o oloa sa teu ai i totonu ae na faapena foi foliga o le loli na matuā lē aogā lava le pito i luma. Na vaaia le foeuli o le taavale ua taatia i fafo o le auala ina ua tau suesue e le Tineimu ma Tali o Faalavelave Faafuasei le nofoaga na tulai mai ai le faalavelave.
O le toatolu ia na lavevea na vave ona agai ane tagata na molimauina le faalavelave ma taumafai e aumai i fafo o le pito i luma o le loli lenei ma ave loa i le falemai. Sa i se tulaga tigaina i latou nei ae e lei sau lava se lipoti i le falemai e faatatau i lenei faalavelave ma le tulaga o le pasese. E iai masalosaloga na faasuaavā i latou sa malaga mai i le loli lenei ma na vaaia ai ni fagupia ua taei i fafo ane o le taavale i suesuega o mea ua faaleagaina i lenei faalavelave. Ona pau le faamatalaga a tagata na molimauina le faalavelave e foliga mai lava ua saosaoa tele le taavale ae o le sē ese mai i le auala ma agai i tua i le pusa la‘u oloa lea, e lē o manino pe aisea. E toatasi le isi alii na malaga ai i lea taavale na faasao mai i manu‘a tuga ma na taofia uma lava le toatolu ia na lavevea. O lē ua sao mai, o loo fesiligia e leoleo ia latou suesuega.
Na toe faamanatu mai ai foi e le Komesina o le Tineimu ma Tali o Faalavelave Faafuasei ia Lelevaga Fouina Mupo, i le atunuu e vili atu pe a tulai mai faalavelave faapenei, e ui na faafetaia le vave o le gaioi a tagata na molimauina lenei faalavelave i le ave o i latou na lavevea i le falemai ae na ta‘ua e Lelevaga ana lē ui ane lava le latou taavale i Vailoa Faleata, e lē iloa le mea ua tupu ma na agai ane loa ma taumafai e faamautu le ave o tagata nei i le falemai ae fai suesuega i le faalavelave.
E tulai mai lea faalavelave ae faatoa mae‘a lava le aoaoga ua faatautaia e le pulega o felauaiga i luga o le fogaeleele (LTA) e faatatau i le tomai e mafai ai ona faaaogā masini (radars) e tapue ma faamauina ai le saoasaoa ua oo i ai le malaga a taavale i luga o alatele o le atunuu.
Ua tele faalavelave ua tulai mai ona o le saoasaoa tele o le aveave a nisi o le atunuu ma o le mafuaaga lea o le unaia o le aumai o nei masini e pei ona vaaia i le tele o atunuu i fafo.
O lea ua aoaoina uma ai foi sui o le LTA o loo tiute i luga o alatele i le faatautaiga o nei masini ma le faia o moliaga o i latou e maua o soona saosaoa le aveave ai i taavale ma ono lamatia ai le soifua o tagata o le atunuu.
