Ua tu lata ina faaiuiu galuega o le tausaga ma ua faaiu ai foi ma tiute o susuga i faafeagaiga ma o latou faletua faapea faiaoga Aso Sa o loo latou aoaoina fanau e ala i le Afioga a le Atua. O tausaga uma lava e faia ai suega a fanau i totonu o matagaluega taitasi a le Ekalesia Metotisi, mai lava i le vasega laiti muamua A, seia oo i le vasega 10.
Ma o nei suega e saili ai le tamaititi e sili aoao i le faasinoti atoa, aemaise lava i vasega maualuluga (10). O suega na sue ai le fanau, na seki tasi mai lava i Samoa i le ofisa tutotonu o le Ekalesia, ae sue lava tamaiti i le latou falesa ae feoai le aufaisuega i falesa taitasi. O le togiina o suega, o le vasega muamua A, e oo i le vasega 9 na togi lava e le Faa-Sinoti ae se‘i vaganā ai le vasega 10 na togi mai i Samoa i le ofisa tutotonu o le Autalavou.
O le faasinoti a Aukilani i Saute e 11 matagaluega o loo auai i totonu ma o loo avea ai le susuga i le faafeagaiga ia Masunu Utumapu ma le faletua ia Senerita Utumapu ma Sea, ma o laua foi o loo tausia matagaluega i Manukau.
O le Aso Toonai na tea nei 6 o Aukuso o se aso sa atofaina e le afioga i le Sea ma le faasinoti a Aukilani i Saute e faataunuuina ai le laugatogi a le fanau, ma sa amata le polokalame i le sauniga lotu na taitai e le Afioga i le Sea ia Masunu Utumapu, ma faagasolo ai loa le tolaulauina o togi a le fanau.
Na faatumulia le maota o le matagaluega i Manukau i mātua ma fanau aemaise o susuga i faafeagaiga ma o latou faletua na molimauina le taumafai o alo ma fanau. Na mae‘a le tolaulauina o togi, ona sosoo ai lea ma fiafia mo i latou ua mau tulaga i lenei tausaga.
O le tulaga muamua e oo i le tulaga tolu o i latou ia sa faaautu i ai nei samigafaailoga. Na vaaia le fiafia o matua i lea aso ia latou fanau ona ua maua le isi meaalofa sili mo le aso sa o tamā.
O le tamaitai ia Sevia Setali Fata Luapene o le vasega 10 a le ekalesia Metotisi i Papakura o ia lea ua sili aoao i le faasinoti atoa i Aukilani i Saute ae tulaga tolu i le Ekalesia aoao ma atunuu i fafo. O le agaga fiafia foi lea o le susuga i le faafeagaiga ia Letalie Fomai Tauialo Pasene ma le faletua ia Tiliotaua ona ua faamanuiaina se tasi o le la ekalesia i lenei faamoemoe tāua mo alo ma fanau aoga.
Ua avea foi o se meaalofa sili a lenei tamaitai mo lona tamā aemaise foi o laua o loo tausia le matagaluega. E fā ipu o le sili i le tulaga muamua i ia vasega, e toafā e na faamanuiaina i le tulaga lua, e toafā foi tamaiti na mauaina le tulaga tolu.
Na momoli le faamalo a le susuga i le faafeagaiga ia Letalie Fomai i lana fanau i le filigā ma sueuse i le afioga a le Atua. O la a le Aposetolo, o le measili pe a ou faalogo ua savavali lau fanau i le upu moni.
