O se aso fiafia ina ua feiloai aiga ma uo aemaise le ekalesia, mo le molimauina o le aso ua faapineina mo le faaipoipo atu o le alii o Jack Roberts e faatasi atu i lana manamea o Blessing Leilua.
O le falesa a le Encounter Christian Centre i Avondale sa faataunuuina ai le sauniga paia o le faaipoipoga i le Aso Toonai ua mavae atu nei. Ua avea ai nei i laua o se tino e tasi, ina ua faapaiaina e susuga i faafeagaiga i le faaee atu o latou aao i luga o laua, i se tatalo na taitaiina e le susuga Pastor Viliamu Mafoe mai le Worship Centre i Samoa.
O le laugaina o le upu folafola a le Atua na fofogaina lea e le susuga faafeagaiga Ps Samoa Unoi mai le Peace Chapel i Samoa. O Blessing o se alo faasino i le susuga faafeagaiga Nanai Aperila ma Fale Leilua, ua tuumalo le susuga i le faafeagaiga i le tausaga na tea nei. Na fofogaina se faamanuiaga mai o la mātua, e pei o mātua o Jack o Sammy & Fetalaiga Roberts, faapea foi ma le faletua ia Fale, i le taimi o le sauniga paia.
