Faailogaina faatasi le Aso Soifua o le Tina ma lona Alo

E sea sea lava ona tupu i le soifuaga ni vaega faapenei, e pei ona maitauina i le Aso Toonai aso 16 o Iuni 2018, lea na potopoto ai aiga ma uo aemaise o le paia o le aulotu a le Ekalesia AOG Samoa a Coliton, e faafetaia ai le alofa ma le agalelei o le Atua ina ua mafai ona aulia mai le 50 tausaga o lo latou Tina Faaleagaga, aemaise ai o le alo o le ekalesia ma le latou faafeagaiga ia Pastor Leaegalesolo Fuiavailili Fialelei, le atalii ia MJ Fialelei ina ua ia aulia mai le 21 lenei o ona tausaga.

I le potopoto ai la o aiga, le ekalesia ma uo ma paaga a le faletua ia Rachael Rasela ma si ona alo ia MJ Fialelei i le Community hall i St Marys na amataina ai lava i le sauniga lotu na taitaia lea e le susuga ia Senior Pastor Motu o le AOG ma nisi o Faifeau lava a le Ekalesia. Na ia faatauaina ai le alofa tunoa o le Atua i le na te fiafia i le Atua i ona ala uma. Na momoli ai foi faamanuiaga mai le aufaigaluega mo le faailogaina o le 50 tausaga o le soifua o le faletua aemaise foi si ona alo ia MJ Fialelei.

O le afioga ia Toelafoa Leoo Saemo sa avea ma fofoga o le aso, aua le faasoloina o le polokalama i ona vaega uma. E ala lea i saunoaga ma faafiafiaga sa saunia lava lea e le autalavou a Coliton ma le autalavou a Blacktown.

O le saasaaga faasamoa na nafa lea ma le alo tamaitai o le uii foi lea o alo o le faletua ia Rachael ma le faafeagaiga ia Pastor Leaegalesolo, le tamaitai ia Samantha Fialelei.

O le afioga lava ia Toleafoa na fai ma sui o aiga ma le faletua ia Rachael ma si ona alo ia MJ e molimoli le agaga o le faafetai ma le faamalo i le galuega fita a le aufaigaluega a le Atua e ala i talosaga ma faamanuiaga, ae tainane o le alofa foai e ala i teutusi ma faamanuiaga. Aemaise ai o lo latou taimi faamaumau ua le manatu ai i o latou faiva masani, ae ua faamuamua lava ia i latou le faatalauula mai a le susuga i le faafeagaiga ma le faletua.

Na maua le avanoa o Aiga ma le Usoga e saili ai se tootoo aua le maualuga o le aso, ma tasi ai le sivaloa ma le faatau paia i le faautautaga ia Alataua, o ia foi o le fofoga o le aulotu a le AOG Samoa a Coliton e faaleagatonuina ma talifuaitau ai i le tofa faasau a le afioga i le Tapaau Faasisina, le afioga ia Toleafoa Leoo Saemo, ona saunoa lea o le susuga i le Taitai ia Senior Pastor Motu ma tatalo faamanuia ai mo le faaiuina o le aso.

Na malaga mamao mai lava mai le atunuu i Samoa le Tina matua o le susuga i le faafeagaiga o le Tuaa lea o le alii o MJ Fialelei, ona o le fia auai ma molimauina le aso o si ona alo. E momoli ai le faamalo ma le faafetai tele i le susuga i le faafeagaiga ia Pastor Leaegalesolo Fuiavailili Fialelei le faletua ia Rachael ma le susuga ia MJ Fialelei ona o faaaloaloga o le aso, aemaise ai o le amanaiaina o le Sui o le Samoa Times aua se tala manino o le faamoemoe. Faatasi ai ma a matou faamanuiaga mo lo oulua aso faapitoa o le manatuaina pea o le alofa ma le agalelei faasoa o le Atua i lo oulua soifua. Ia manuia tele lo oulua aso fanau faailogaina.