Na faamanatuina le atoaga o le 80 tausaga o si o matou tina, le Tina Malolo Manumalo, o Samoamuifaalele Ioelu Seualuga, i le Aso Toonai, 25 Iulai 2015, i le Malaefesilafai Hall a le Ekalesia Metotisi Samoa i Manukau, lea o loo tausia e le susuga i le Sea o le faasinoti i Aukilani i Saute, le susuga ia Rev Masunu Utumapu ma le faletua ia Senerita.
Na amata i le sauniga lotu na taitaiina lava e le afioga i le Sea, Rev Masunu Utumapu.
Na maualuga lea aso i le mamalu o le Ekalesia Metotisi i Manukau, o uo ma aiga uma aemaise lava o alo ma fanau o ē na tutupu mai i lenei tina.
E toatele na malaga mai Ausetalia ma Samoa, auā le fia auai i le aso faailogaina o le tina.
Sa maua foi le avanoa e auai mai ai le afioga i le Peresetene sili o le Auuso a le Ekalesia Metotisi i Samoa ma atunuu i fafo i lenei faamoemoe.
Na mae‘a le sauniga ona sosoo lea ma le taumafataga matagofie na saunia lava e le fanau auā le mamalu o le aufaigaluega ma le auvalaaulia, ona sosoo lea ma faafiafiaga na saunia e le fanau.
O le fofoga o le aso o le tofa ia Fonomaaitu Ioelu Jr Ioelu, ae o le tofa ia Seualuga Pasese Tavita Ioelu sa momoliina se meaalofa a le tina i le aufaigaluega ma le auvalaaulia e ala i faaaloaloga masani.
Ia toe foai e le Atua nisi aso se tele i le tina e auauna ai pea mo Ia ma lona finagalo.
