Susuga i le Toeaina ia Rev Elder Dr Vili Iosua ma le faletua ia Folose

Susuga i le Toeaina ia Rev Elder Dr Vili Iosua ma le faletua ia Folose

“Lo’u agaga e, faamanu atu ia Ioeva. O mea uma foi o i totonu ia te au faamanu atu ai i lona Suafa Paia.”

O upu na saunoa i ai le afioga i le Taitaifono o le ‘Fono Samoa NSW’ le afioga ia Tiumalumatua Lilomaiava Su’a i lana saunoaga faamanuia i lea aso na ia faapea ane ai, “O saunoaga o lenei aso o loo atagia ai le tele o tausaga o le mafutaga a le susuga i le Toeaina ma latou nei, aemaise foi o loo faailoa mai ai le tele o tagata ua faamanuiaina o latou olaga faaleagaga ona o le galuega ma faiva o le faafeagaiga nei ia Vili Iosua. Ae o a’u e na’o le tasi pe lua ni itula na ou masani ai i le susuga i le Toeaina ia Vili Iosua.

O le aso na ma malaga mai ai ma le failautusi o le ‘Fono Samoa NSW’ e logoina le faafeagaiga i lona lautogia ai i sauniga o le lotu o le Tutoatasi. Ae ina ua susu mai le Toeaina ma matou feiloai ma tatala atu foi le avei o le ma savali, ae o le taimi lea ua gaoioi mai le faletua e tapena mai le matou iputi. E ui lava ina tetee atu, ae le mafai lava le agaga talimalo ma le faaaloalo o le Toeaina ma le faletua.

Ina ua mae’a le matou fesilafaiga ma ua taliaina foi le ma savali, ona matou faamavae lea. Ae o le taimi lea na ou vaaia ai le tapa o le Toeaina i lana ato e fai mai lana faaaloaloga mo ma’ua. Na susū lava le failautusi i fafo e lei faatali, ae o a’u ua ou le iloa pe ou te mulimuli atu i le failautusi pe ou te faatali i le augani mai a le susuga i le Toeaina. O le auga o la’u molimau”, o le saunoaga lea a le Taitaifono; “ona pau lenei o se faifeau ua ou mafuta i ai, e fiafia e tuuina mai tupe e faimeaalofa ai i tagata poo matai o le atunuu, aua ou te iloa lava, e fiafia faifeau e tuuina atu e tagata tupe mo latou.”

“O uiga ia o le susuga i le Toeaina na ou iloa ai, o se faifeau e ese lona lagona ma na te faatauaina foi tagata, ae le naunau i ni tupe e avatu e tagata mo ia.” I le iuga o lana saunoaga na ia momoli ai faamanuiaga mai ia te ia ma lona faletua, aemaise o le Fono Samoa NSW mo le aso soifua o le susuga i le Toeaina ia Rev Elder Dr Vili Iosua.

O le potopoto ai o aiga o le susuga i le Toeaina ia Dr Vili Iosua ma le faletua ia Folose, aemaise ai o si a laua aulotu a le Metotisi Fou a le Atua i Campletown, ona o le fia molimauina lea o le alofa le mavae o le Atua mo le susuga i le Toeaina e ala i le 60 o tausaga o le tausiga ma le puipuiga a le Atua mo ia. Ua le gata i le malosi i le tino ae faapea foi le mafaufau ma le agaga, o loo mafai ai pea ona ia tauaveina le taitaiina o le Feau ma le Galuega a le Atua i le Tovine o loo galulue ai nei.

O molimau foi mai le susuga i le faifeau malolo ia Rev Toleafoa Poliko ma susuga i Failauga o le Talalelei, na manino ai le tele o le sao taua o le Toeaina ia Dr Vili Iosua na luitauina ai i latou ina ia tulai a’e e tauaveina tofiga ma le valaauina o latou.

O se faafeagaiga, sa avea ma sulufaiga o le tele o tagata Samoa sa ova o latou aso e nonofo ai i Ausetalia, ona sa ia faamaopoopoina mai i latou i lo latou maota, ona ia aami lea o si ona uso fai o se alii loia o Faamasinoga i Ausetalia (Barrister) ma talosaga i ai e alofa fesoasoani i nei tagata ua aafia ina ua solitulafono i aiaiga tau femalagaaiga.

E ui lava ina logoina e si ona uso Barrister o ia e le se loia e o tagata lautele e vaai, se’i vagana loia latou te totogiina o ia mo a latou faamasinoga i le Fale Faamasino, ae e le solomuli ai lava le faafeagaiga ona o lona alofa i nai o tatou tagata.

I molimau lava a le fanau, na matua faamaninoina ai, o le susuga i le Toeaina, o se faifeau e tumu i le alofa ma le faaaloalo. E le fiafia pe a faia e le ekalesia ni fuafuaga e faamamafa ai ni avega i tauau o tagata lotu. O se faifeau e tetee i le faia o ni ona alofa. Aua fai mai a ia, o faamanuiaga mo ia o loo ua ala mai lea i lana fanau ia latou galuega, ae o se faifeau foi e tumu i le osi aiga ma taulamua i le faamaopoopoina o tamafanau a lona afioaga e tali atu i manaoga o lona nuu i Samoa, i taimi e tagi mai ai i se fesoasoani.

I lana molimau na ia faamatalaina ai, lona lei silafia o le tapenaga o lona aso fanau. Ae o se tasi o aso na ia fai ai i lona atalii laititi o Pati Iosua, e aumai le ato a lona tina sei aumai ai le sim card o lana mobile, ma ia maua ane ai ni tusi valaaulia ua mae’a ona tapenaina o valaaulia o lona 60 tausaga. Na ia logo lona faletua ma lana fanau, pe aisea ua faia ai lea fuafuaga e aunoa ma lona iloaina.

O le tali mai le faletua ma le fanau, malie sa taumafai lava ia faia o se faateia (surprise) mo ia. Ae o le saunoaga a le Toeaina, “Ae a faapefea la pe a ou le fiafia ai i a outou tapenaga, ona ua outou iloa a’u (Dr Vili Iosua) e le manao i se mea ae faaletonu”. Ae tali mai le fanau, “Tama ua matou iloa uma lava mea e te agaga i ai, ma o lea foi ua matou tapena uma lava i vaega uma na”.

O nai ona alo lava sa avea ma fofoga faatonutonu o le aso, ae o le susuga i le Failauga ia Misa Viali Lesa na taitaiina le sauniga, ae tapuai isi failauga o le ekalesia. O le Fofoga o le ekalesia ia Misa na saunoa e tali fuaitau i le Fofoga o le aso ona o faaaloaloga e ala i teutusi mo le aufaigaluega ma Failauga aemaise foi o le Taitaifono o le Fono Samoa NSW ma lona faletua. E saga momoli atu ai lava le faamalo ma le faafetai i lau susuga i le Toeaina Dr Vili Iosua ma le faletua ia Folose mo le amanaiaina o nai o matou tagata ma le tautua a le Samoa Times, aua se tala mae’ae’a o aso faailogaina faapenei. E faapito se faafetai i alo o le susuga i le Toeaina ona o le vaavaai i le matagofie o lo outou faatinoina o le aso soifua o si o outou Tama. Ia saga faamanuia le Atua ia te outou ma foai pea mo outou le loto matala ma le uiga loto atunuu aua nisi fuafuaga fai mo le lumanai.

O le tala a le Tusi, “Aua e faia lava e outou o mea sili ma outou manumalo ai lava”.