O Malaeola Centre o le nofoaga tutotonu (laumua) o le mafutaga a Ekalesia Katoliko Samoa, e aofia ai aulotu e 25 mai Palisi eseese o le Puleaga Faaepikopo Katoliko o Aukilani.
Na fausia ma umusa i le aso 12 o Aukuso i le tausaga e 1995. Na tatala mai le avanoa e le Epikopo o Aukilani e fausia ai lenei nofoaga e tusa ma le talosaga a nisi o tagata lotu Samoa, sa feoai solo i malae Maori ma paka, e faia ai sauniga lotu faapitoa aemaise o tu ma aga faa-Samoa i na vaitaimi.
O le amataga o lenei tausaga sa faia ai le fono aoao a le Peresetene ma Ofisa filifilia o aulotu taitasi ina ia faailogaina le 20 tausaga o Malaeola, sa loto gatasi uma i ai le ofisa ma le teuteuga o le manatu e tasi le aso e faataunuuina ai, ma o se avanoa lelei ua lē tele ai ni sauniuniga a le ofisa ma aulotu taitasi.
O galuega faapitoa sa toe faia i Malaeola, o le faafouina lea o le Faitotoa ma le Ala ulufale i totonu o le lotoā, lea e tusa ma le $150,000 le tupe sa faatatau mo lenei atinae. O se tasi atinae tāua ua tatalaina o le Upega o Fesootaiga poo le Website a le mafutaga a Ekalesia Samoa www.samoacatholic.org.nz, ma ua taula atu lenei upega autu a le Puleaga Faaepikopo o Aukilani auā le faasaoina o tupe.
O le masina o Iuni i le tausaga ua mavae 2014 na lesitalaina ai o se kamupani aloaia (private company) ua faaigoaina o le Malaeola Centre Limited; o lenei kamupani o se tasi o meatotino a le Epikopo o Aukilani ina ia tusa ai ma le Faavae (Cannon Law) a le Ekalesia Katoliko.
O le tofa na liliu ma na taliaina e Epikopo Patrick Dunn, le faavaeina o se kamupani mo le talosagaina o se laisene talafeagai e mafai ai ona faia o suegatupe faaletulafono a le Mafutaga Ekalesia aoao.
Talu mai le aso 25 o Fepuari i le tausaga nei o loo ua iai le laisene numera 3 ua tuuina mai e le Matagaluega o le Lotoifale (Department of Internal Affairs) lea ua faaaogāina e faia ai taaloga sue tupe o le Housie, ua mafai ai ona oo atu le maualuga o faailoga i le $52,000.00 i vaiaso taitasi.
O loo lesitalaina foi le Mafutaga aoao, o se “Charitable Trust” i lalo o le igoa “Auckland Diocese Samoa Catholic Community Chaplaincy” ma o le komiti faafoe (Executive Committee) mo le umi e 5 tausaga, aofia ai le afioga Patele Michael Alipia Endemann (Chaplain) Afuamua Felise Lafaele (Executive President) Maiava Vaigafa L Setefano (Executive Vice President) Taupau Petero Mulipola (Executive Secretary) ma Tamala Malaki Vitale (Executive Treasurer).
O le Aso Toonai ua mavae sa alalaga fiafia ai aulotu e 25 mai Palisi eseese ma le aufaigaluega totofi a le Atua afioga i Patele faapea aiga ma uo e sii le taulaga faafetai ma le faamanū i le Atua ona ua atoa le 20 tausaga o le Malaeola Centre. Ae o se taeao fou e toe to manatu ai i le faamaoni o le matai silisiliese i galuega lelei ma mea ua tapenaina mo le Ekalesia Katoliko Samoa i Aukilani.
Sa auai foi le afioga i le Konesula o Samoa i Aukilani, ia Faolotoi Fatialofa Reupena Pogi faapea le faipule o Magele le Tofa Su‘a William Sio. O se aso lagilelei ma le susulu o le lā a o faapaia le galuega o le faitotoa ma le auala ulufale.
Sa faaiu i le taualaga o le Misasa e pei ona taitaia ai e le taitai aoao o le pulega Katoliko i Aukilani ia Bishop Patrick Dunn faatasi ai ma le lagolagosua a Father Michael Alipia Endemann ma nisi o afioga i Patele.
O galuega uma sa toe faaleleia i le lumua, faatasi ai ma le tatalaina o le website a le Ekalesia sa faapaia uma i lea aso atoa ai ma le faamantuina o le 20 tausaga. O viiga o le Atua na lagiina lea e le aufaipese a le Ekalesia Katoliko mai Te Atatu.
Na mae‘a le sauniga o le Misasa ona sosoo lea ma le taumafataga, na tapenaina lava e aulotu taitasi la latou faamalositino, faapea le ofisa sa latou saunia taumafataga mo le mamalu o le auvalaaulia.
O le afioga ia Maiava Vaigafa L Setefano sa fai ma fofoga o le aso, o saunoaga autu o le faamoemoe na saunoa i ai Afuamua Felise Lafaele (Toast – Faamanuia mo le auvalaaulia), Bishop Pat Dunn (Launch the new Website) ma Father Michael Alipia Endemann (Faapaia ma feula moli o le keke o le Aso fanau).
Sa faapea foi ona faafiafia ai ma le ofisa o le aoga aso sa, aumalaga Autalavou i le ATS faapea le Asosi tamaiti aoga Samoa AUT. Na taualuga le faamoemoe i faaaloaloga e pei ona masani ai aso faapenei i meaalaofa mo le mamalu o le auvalaaulia aemaise o nofo a tofi eseese o le Ekalesia i Aukilani. Ae faaiu ai i le latou fiafia sa faia lava i le laumua i le po lava lea e faamanuia ai le Aso fanau o Malaeola.
