E tasi lava le mafuaaga o lea taeao, 29 Iuni 2018 i le malae o Piula i Lufilufi, o le faamanatuina lea o le 150 o tausaga talu ona faavae le aoga poo le kolisi faafaifeau a le ekalesia Metotisi a Piula i Samoa.
Na faatumulia ai le malae o le kolisi i Piula ona o sasa ma sauniga e faamanatu ai lenei faamoemoe taua i tala faasolopito o le Metotisi i Samoa talu mai le tausaga e 1868.
Peitai o le atinae sili ona lauiloa ai o le lotoā poo le malae lenei o le aoga faafaifeau i Piula, ona o lona vaitaele e tafe mai le ana, o papa maa o loo tu ai luga le falesa, ma maua ai le taelega loloto e silia i le fa futu le loloto.
O le tele o aoao, e aooga i le kolisi lenei ta’i fa tausaga, ma maua o latou faailoga faapitoa. Peitai, i le tala o le amata mai o le kolisi faafaifeau i Satupa’itea i Savaii ma sii mai ai i Piula, maitauina le lasi o suiga i le taimi nei, e le gata o atufālega, ae o maota o le maa faamanatu, ma le malumalu.
E oo i le pa sima mafiafia maualuga ua siomia ai nei le lotoā o le koilisi, ua saga siitia ai lona tulaga i le vaaiga faalelalolagi nei.
I le tele o tausaga talu mai le 1868 sa taumafai mai lava le atinaeina o le kolisi e le Misionare ia George Brown, e le gata o le tau amataga o le aoga faafaifeau, ae o le aoaoina o tagata Samoa i galuega faamisionare i na taimi. E le gata ina aoaoina o le tomai o le mataupu silisili, ae na’o faatasi lava le faaleagaga ma a tatou agaifanua pei ona faamauina.
I le faatoa amatamata mai i Satupa’itea Savaii, sa faia i fale Samoa, ae sa na’o le 16 tamaiti aoga. Ae o le 1868 ua iai le fanua o le tasi o Misionare, Rev Frank Firth o le fanua lea na faatuina ai loa le aoga.
Na faasolo mai ai lava se iai oo mai ina fausia maota faaona po nei, ma silia i le 30 Aoao, ua siitia foi tulaga o maota ua nonofo ai ma fale aoga, faapea foi le malae ma ona atufālega.
Talu mai le 1828 i le tau amatamata mai o le ekalesia, ma faaauau mai ai lava ona usu ana Koneferenisi faaletausaga, pei ona iai i le vaiaso lenei mo le mafutaga a tina, ma faasolo atu ai i le koneferenisi tele e a’e mai i le Aso Sa o le vaiaso nei.
Mitamitaga i le tautua a tuaa
O le atoaga o le 150 tausaga o se mitamitaga tele lea i alo ma fanau a taitai o le Ekalesia ua tofafa mai tia sa.
Pei ona faaleo ai lagona olioli ma le faafetai o alo o le Pule aoga Samoa muamua o le Kolisi faafaifeau a Piula, Rev Sione Ala’ilima. Le afioga i le Le Tagaloa Pita Ala’ilima, “E lē mafai ona galo taimi o le taumafai o matua, i na aso mai le faigata o na taimi, faatusa i lenei laasaga maualuga ua oo iai le kolisi o Piula I aso nei.” Na talanoa foi le afioga a Leiataua Kilali Alailima, e fafetai i le avanoa ua mafai ona molimauina e o latou augatupulaga lenei laasaga matagofie ua oo iai le kolisi faafaifeau o Piula, i le 150 tausaga mulimuli ane.”
Ae e manatua foi e le Susuga i le faafeagaiga faifeau malolo penisiona manumalo, Afereti Samuelu, i ona ia taimi sa nonofo i Fale Samoa ma aooga ai, sa ato launiu fale, ma pola vai, e tau faamalulu ai le fola o le fale nofo i na aso.
Sa alu i fafo ma foi mai lava, ae tumau le agaga e atinae lenei nofoaga, pei ona tula’i mai ai nei, e faafetaia ai le pulega o le kolisi o iai nei, ma taitai o le ekalesia.
Ae na talanoa foi le tasi o pepe na fanau i le lotoā, ua 68 nei tausaga o le soifua, “Oute mitamita tele i le nofoaga lenei, aua o iinei o loo tanu ai lo’u pute. Sa aooga ai o’u matua i Piula, ma o’u fanau ai, ou te alu lava ma o’u sau ou te taele i le ana o Piula. O le mafuaaga foi lea o lo’u naunau ou te sau i le aso lenei.
E tele tala o Piula, mai lona amataga ae o le laualuga o tala faasolopito o Piula o loo susulu ai le malamalama o le Atua e ala i lana Talalelei o loo soosoo atu i le lalolagi atoa e A’oa’o na a’otauina i le kolisi faafaifeau talu ona amata mai.
