O le masini fa‘ata mo le malaevaalele i Faleolo, le fausia o le falemai faaitumalo i Faleolo, se vaega o foma‘i mo le fonotele a malo laiti, $120,000 ua tuuina atu i le SPREP ma nisi o fesoasoani lata mai a le Malo tele o Amerika mo Samoa, o nisi ia o faailoga vaaia o le mafanafana ma le valalata pea o sootaga o atunuu e lua.
Ua faailoa mai e le sui o le Malo Amerika i Samoa ia fesoasoani a lona malo na faalauiloa talu ai nei, ina ua faamanatu i Samoa le atoaga o le 238 tausaga o le Malo Tutoatasi o le Iunaite Setete o Amerika sa faia ai se sauniga o se fiafia i luga o le vaa o le gataifale o le puipuiga o Amerika le US Coast Guard Cutter Rush sa tuta i le uafu i Apia i le vaiaso na tea nei.
Sa auai le afioga i le Palemia susuga Tuilaepa L Sailele Malielegaoi ma nisi o minisita o le kapeneta ma faipule o le Palemene. O sui o Malo i fafo o loo galulue i Samoa ma nisi lava o malo valaaulia taualoa ma le lautele o le aufaipisinisi ma faalapotopotoga tumaoti i Samoa.
O saunoaga o lea sauniga na laualuga ai le tala lelei o le mauaa pea o sootaga o Samoa ma Amerika i le tele o tausaga. E pei ona silafia e le atunuu, o se tasi lenei o Malo i le talafaasolopito o Samoa sa lotolotoi i le taimi o loo iai le atunuu i pulega faakolone a isi malo i fafo.
O Amerika foi na tu malosi ma isi malo e pei o Peretania e puipui Samoa mai le malosi o le malo Siamani i le vaitau o le taua muamua ma le taua lona lua o le lalolagi.
O Amerika foi o loo lauolaola i tala faamaumau o le lalolagi o loo ia pulea le tasi itu poo isi motu o le atu Samoa e pei o Tutuila ma Manu‘a ma avea ai ma ona teritori.
Pe a fua i le selau tausaga ua mavae ma mea na tutupu ai, o loo faaauau pea le mafutaga a Samoa ma lea malo tele ma malosi o le lalolagi e lē gata o lona tamaoaiga a o lona malosi faafitafita.
O le sasaa mai o ana fesoasoani e lē o faatusalia foi ma le agalelei o isi malo o loo fai paaga ma Samoa e pei o Niu Sila ma Ausetalia, faapea Iapani ma Saina o ni malo o loo fesoasoani malosi foi i le atina‘e o le tamaoaiga o le tatou atunuu.
O le atinae o faigafaiva ma le puipuiga o se isi lea o vaega tāua o loo galulue faatasi ai malo e lua i le taimi nei, e pei ona sa iai ni suesuega a vaa suesue o Amerika i le gataifale o Samoa sa faia i lenei tausaga sa faapea ona auai ma ni ofisa sinia o faiga faiva i Samoa.
O le faailogaina la o le tutoatasi o le malo Amerika i Samoa i lenei tausaga ua lē gata ina faamauina ai le mafutaga faaleuo a atunuu e lua ae ua toe faatepa ai o tatou taitai ma tagata i le agalelei mai o lea Malo.
