Na faatumulia se tasi o malu mo faamoemoe tetele i le pitonuu o Fawkner i le Aso Faraile na se‘i mavae atu nei, i tauaiga, uo ma ē masani, aemaise o le mamalu o le valaaulia ma Samoa na potopoto, e patipatia ma faamanuia i le aulia o le 60 tausaga o le soifua o le susuga i le A‘oa‘o o le ekalesia EFKS i Glenroy, lea o loo faauluulu i le susuga i le faafeagaiga ia Paul Gray ma le faletua ia Taulogomai.
O le susuga ia Saulaulu Tugaga Taula e mai le alalafaga o Taga i Savaii, e afifio i Craigieburn ma le faletua ia Loketi ma le nofoaalo. Maeu faaaloaloga na alo i ai aiga na lua e ala i le taumafataga aemaise o agaifanua e masani ai i faamoemoe nei.
O le fofoga o le afiafi o le tofa ia Tamala poo le afioga ia Vaaimalu Leia. Na ta‘ape le fuamanusina ma le mama ua lomi ma le vaa ua goto i faaaloaloga. Faamanuia le Atua i le aso soifua o lau susuga a le alii A‘oa‘o, foai nisi tausaga se tele mo lou soifua.
