Faailoga 40 tausaga o le faigauo a Korea ma Samoa

O Korea i Saute le atunuu o le atu Asia na muamua osi le la faigauo ma Samoa i le tausaga e 1972 i le tuanai o le sefulu tausaga talu ona tutoatasi lo tatou atunuu.

Mai lea tausaga e oo mai i le tausaga nei, ua atoa le 40 tausaga o le faigauo i le va o Malo e lua. Pe a fua atu i le vavalalata o sootaga o Samoa ma le Malo o Saina le isi atunuu mai le atu Asia, e pito matua lava sootaga o le tatou atunuu ma Korea i Saute.

E iai fesoasoani na sasaa mai e lea Malo e pei o taavale na foai faameaalofa mai e lea Malo i le vaitau o le 1986 i le 1987, lea sa faaaoga e nisi o matagaluega a le Malo e pei o le ofisa o le Palemia, le vaega o femalagaiga ma le ofisa o pulenuu.

O le amataga o le tausaga nei na aumai ai foi isi taavale fou o le ituaiga o le Sedan Hyundai, ma o loo taatia lea foai i le Malo. Ua faaalia e se alii ofisa o le vaega o le va i fafo e lei faaaogaina taavale ma e le o iloa poo fea tonu le vaega o le Malo o le a ave i ai.

Ua fai si umi o tausaga e le o toe aapa mai le lima foai o lea Malo e aumai ni fesoasoani tetele mo Samoa. Peitai e ui ina le vaaia lea tulaga pe a fua i le 40 tausaga o le faigauo mafanafana a malo e lua, ua faaalia e se alii ofisa o le Matagaluega o le Va i Fafo, e tele isi fesoasoani e le o iloa o loo fesootai ai atunuu i le saofaiga a Malo Aufaatasi le United Nations i lona ofisa autu i Niu Ioka i Amerika.

O le mataupu o loo laualuga i le lalolagi agai i le suiga o le tau poo le climate change, o se tasi lea o sao taua o Korea mo Samoa i totonu o le saofaiga a Malo Aufaatasi. E lomia lenei lipoti e lei mae‘a ona tuufaatasia faamaumauga a le vaega o le va i fafo a le Malo o Samoa i ni fesoasoani sa faaauala mai i le agalelei o lea Malo, e pei ona iai lona Amapasa mo Samoa e faamautu i Ueligitone i Niu Sila.

O le Aso Lua, 17 o Aperila 2012 o le a faamanatu ai le atoaga o le 40 tausaga o le faigauo ma sootaga o Korea i Saute ma Samoa, pe a mae‘a ona tauaao tusi tofiga o lona Amapasa fou i le Ao Mamalu o le Malo. Faaalia e le sui o le Amapasa i Samoa o se sauniga o le a aloaia ai pea sootaga o malo e lua. O se tasi o atunuu asia ua osi feagaiga ma Samoa o le atunuu o Saina lea na faamauina aloaia i le tausaga e 1976.

Ua tolusefulu ma ona tupu tausaga o lea mafutaga faaleuo ma sa faamanatu foi e Samoa ma Saina le atoaga o le tolusefulu tausaga o le la faigauo e pei ona faamanatu ai e Korea le 40 tausaga o le mafutaga ma Samoa. O loo iai le naunautaiga o le Malo o Samoa e avea nei sootaga faavaomalo ma isi atunuu i fafo e maua ai le mafutaga vavalalata ma aumai ai pea fesoasoani i le tamaoaiga o le atunuu.