E lua tausaga sa galue ai o se faifeau tala‘i le tamaitai o Narine i le aai o Hamilton i Niu Sila, i lona toe taliu mai i fanua ma aiga i Melepone i le po o le Aso Faraile na tuanai atu, na surprise ai e ona mātua ma aiga e ala i le fiafia sa faia e faafetaia ai le alofa o le Atua i lona toe taliu manuia mai ua mae‘a le valaauina, ae sa aofia potopoto uma foi faatasi ma lana ekalesia e patipatia ma faamanuia lona 21 tausaga.
Na taitaia le sauniga puupuu e le susuga i le sui Epikopo le susuga ia Alai Ianusi faatasi ma le lagolagosua a le susuga ia Paepae Leausa, a o si ona tuaa lava ia Fiu Talosaga na faafoeina le polokalame.
O se tasi o itu na faateia ai le tamaitai ona na malaga mamao mai lava mai Samoa nai ona tuaa sinasina ia Lolofie Falea Toa ma le tina ia Falo Laufala Toa mai le afioaga o Saleapaga Lepa ona o le fia auai i le faamoemoe.
O si ona tuaa sinasina ia Leaauta Iosua Fiu na tauaaoina ma foai le ki o le aso soifua o si ona alo ia Narine, ma ia saunoa ai mo le faalaeiau i si ana tama, ona alo lea i le taumafataga felanulanuai ma silasila maimoa i faafiafiaga matagofie na tapenaina mo lona aso.
Na lufilufi le keke ma faagasolo siva ma saasaaga i le musika mālie a DJ Jonnybgood. Sa saunoa faaiu le sui peresitene 
le susuga ia Davit ma faamatafi ai i le tatalo ina ua mae‘a faaaloaloga ma saunoaga o le afiafi, ma tatala ai le filialii ma le viiga i le Tapaau sili. Malo le tau Narine, ma ia Manuia lou Aso Fanau!
