E le toatele ni alii taaalo e aulia lea tulaga maualuga i le tele o ni taaloga e taaalo ai, e pei ona ausia e le alo o le atunuu le alii o Rodney Sooialo, i lana kalapu i Ueligitone le Hurricanes. Ua mulimuli atu nei Sooialo i tulagaaao o nisi foi o alo o le atunuu i lea kalapu le susuga a Tana Umaga, a o le susuga a Kevin Mealamu mai le kalapu a Aukilani le Blues, ua taufai tutusa ai i latou nei i le tai 100 o taaloga faitaulia i taaloga o Super Rugby.
O le tausaga e 2000 na amata filifilia ai Sooialo e le kalapu a Ueligitone ina ua mae‘a le Taamilosaga Taitoafitu a Niu Sila sa taamilo ai i lena tausaga o le IRB Seven Series, ma sosoo ai ma le maua o lona avanoa i le Taamilosaga o le Super 14 i le Hurricanes, faatasi ai ma lona manumaloina o le Ofu Uliuli a Niu Sila le Olopeleki i le Numera 8.
E le galo e le susuga a Tana Umaga le suega siamupini a Ueligitone ma Canterbury i le taamilosaga o le NPC, i le taimi muamua na uluai vaaia ai Sooialo i le ofu samasama a Ueligitone lea na latou manumalo ai i le talita i le 2000. Fai mai Umaga o se tagata matautia le malosi (fit) ma e soo lelei le malae ia Sooialo e le vaaia se vaivai, ma o ina foi na vaaia ai le agaigai i luma o le taleni lakapi a lea alo o le atunuu.
E tele ni taimi sa faamanu‘alia ai foi le alii i lenei tausaga ma sa lē vaaia ai i taaloga amata, ae le gata foi i lea o le tulaga faigata o le a‘ea‘e mai foi o nisi alii talavou ma fāoa ai lona tulaga Numera 8 e pei o le alii o Victor Vito.
Ua toalua nei alo teine o le alii o Sooialo, lea na ia faailoa o lona taimi tele lea ua ia faamoemoe e faaalu ai, pe a mae‘a le taimi o taaloga, aemaise o lona fia avea lea ma faiaoga o se kalapu lakapi, e toe ofo ai lona silafia i le taaloga, ma ua tala feauga foi ma lana mataupu faafaiaoga o loo ave i le Iunivesete i le Laumua.
O le taaloga la ma le Reds i le po o le Aso Faraile, o se taaloga tāua lea mo le Hurricanes e le gata o le tau sueina o se avanoa mo au pito i luga o le taamilosaga, ae o le atoaga o le 100 tausaga o taaloga a Sooialo.
E ta le ‘afa o tele ‘ai o le Reds i le 21 i le 13, peitai na matuā faapupusa ogaumu e valu o le Afā ma sosoo ai latou sikoa e 4 i le ‘afa mulimuli.
O se tala fiafia i le tapuaiga a le Laumua ma ua faailoga ai ma le manuia le Senetenari o taaloga a Sooialo, ina ua manumalo lana ‘au i ‘ai e 44 i le 21 a le Reds mai Ausetalia.
Ua see atu nei la i le tulaga 4 o le faasologa o ‘au o le Taamilosaga Super 14 le Hurricanes ae toe tasi ai le vaiaso o totoe, lea e taaalo ai le Hurricanes ma le Brumbies i Canberra i le vaiaso fou. E faamalo atu ai le Samoa Times i le tulaga ua laasia e Rodney Sooialo, ma ia tumau pea le agavaa i le taleni o le lakapi.
