Ua alualu pea i luma le iloa ma le tomai o fanau aoga a atunuu taitasi o loo aooga o latou alo i le aoga tulagalua a Bailey Road i Mount Wellington i le faatinoina o tu ma aganuu a latou atunuu e pei ona soifua mai ai.
O nisi o fanau sa fananau i Niu Sila nei ae ua avea lenei polokalame ma mea ua iai se naunautaiga ia i latou e fia maua ma iloa atili measina a latou lava atunuu.
E lua aso na faatinoina ai se polokalame a atunuu eseese e ala i fanau aoga i le aoga tulagalua a Bailey Road.
O le afiafi o le Aso Lulu ma le Aso Tofi na matuā lē ofi ai le hall a le aoga i mātua faapea aiga i le molimauina o nei faafiafiaga. Na faatau tikect e ulu ai tagata uma ae lei mafai ona lava ona o le toatele o tagata e fia maimoa ma matamata i tapenaga a fanau. E tai lua tausaga ma faataunuu lenei polokalame ae ua faalima ai lea talu ona faagasolo.
O le susuga i le alii pule aoga ia Jim Stafford Bush na faafeiloaia le mamalu o atunuu na autovaa atu, faatasi ai ma le afioga i le faipule ia Peseta Sam Lotu-Iiga. Na tatala faafiafiaga e fanau aoga Maoli ma faagasolo ai loa le polokalame. E silia i le sefulu atunuu o loo aooga o latou alo i totonu o lenei aoga.
E taga eseese nei po e lua i le faatinoina e fanau o a latou lava tu ma aganuu. Na o Samoa lava le atunuu e lua ana kulupu, o le fanau laiti e mai le 5 tausaga agai i luga i le 8 tausaga ma le au matutua mai le 9 e oo atu i le 13 tausaga.
O le faletua ia Julie Fonoti o loo taulamua i le kulupu Samoa faatasi ai ma le fesoasoani a Lai Sufa ma nisi o tina i le aoaoina o fanau laiti e ala ia latou siva ma pese Samoa, a o le aumatutua o loo auai ai foi le faletua ia Julie Fonoti ma Robyn Bullough o siva ma le faatinoina o le taualuga.
O le sini autu ma le faamoemoe o lenei polokalame o le taumafai lava ia aoao fanau ia latou tu ma aganuu e pei ona soifua mai ai o latou tuaa, ae lē gata i lea ia latou iloa le faasinomaga ma le tupuaga. Sa faapea foi ona faafefiloi fanau a atunuu eseese ae fai a latou siva i le suiga fou ua ae mai.
O le taualuga o nei po e lua na faaiu lava e le kulupu Samoa i le faatinoina o le moemoe a le taupou ma le galuega a le aiuli e fai. O manatu o nisi o mātua sa auai, e leai so latou talitonuga i le iloa ma le tomai ua oo i ai a latou fanau i le faatinoina o le aganuu, ae o le faafetai i galuega a faiaoga o loo aoao ai fanau ua tele ai se sao mo mātua.
Na saunoa le faletua ia Julie Fonoti e lei mafai ona faatinoina se polokalame faapea i totonu o le aoga, ae o le tele o aganuu ua faia ma le taumafai e mafuta i mātua o tamaiti ma ia iloa e le fanau le mea e sau ai faatasi ma lana tu ma lana aganuu ua mafua ai lenei polokalame.
Ma ua iai foi le faamoemoe o le a faia pea lenei aganuu i le tai lua tausaga ma faatino.
