Ole Faaaliga a Faipisinisi Ausetalia i femalaa‘iga i Sini nei (Travel Expo) 2017, ua maua mai ai foi le tele ose faamāmā avega mo le mamalu ole atunuu i pasese taugofie. Ise ripoti mai le afioga ia Faalavaau Fasitau Ula, le sui konesula ma ole faauluuluga ole Ofisa Turisi i Sini, Ausetalia, ose fiafiaga tele lenei auā ua maua ai pasese amata atu ile $297 mo tamaiti ile alu ma le sau, o tagata matutua e na‘o le $600 Ausetalia.
I totonu o lomiga ma faasalalauga i Ausetalia nei ua vaaia ai le lautele ole faailoaina o faletalimalo ma mataaga e pei o Lefaga ma le ‘Toe Foi ile Parataiso’, le nofoaga ma le fale‘aiga i Sogi ole ‘Amanaki’ faapea le ‘Taumeasina Resort’ i Moataa.
Ile motu tele i Salafai ua faailoa atu foi ia Ausetalia le Savaii Lagoon ma le Stevenson Manase ma le ese ai lava foi o lona matagofie mai Puleono. Ole tele o turisi malaga atu ole a lē gata ile maua ai o tupe e faaalu i Samoa ae ole taliu mai foi o nei turisi ma faailoa io latou aiga, uo ma falefaigaluega le matagofie oloo iai Samoa.
O nisi o Turisi na amata tafafao atu i Samoa ma nonofo ini faletalimalo, ua avea nei Samoa ma o latou aiga lona lua ma ua osia foi ni o latou aiga Samoa e pei o Gary ma Nascia Carley mai Sini, ua fausia so latou fale ma lo latou aiga Samoa e asiasi ma tafafao ai i Samoa. E faapena foi se tina ia Karren Ralph ma lona toalua ma le la fanau teine mai le Blue Mountains ma ua lē misi le asiasi i so latou aiga Samoa ma tafafao ai.
Ua faailoa mai foi ele Afioga Faalavaau Fasitau Ula, o nei faalauiloa ose laasaga faaauau mo le tausaga e lē aofia ai aso faapitoa, ma e mafai ona susū atu le mamalu ole atunuu mo nisi faamatalaga ile ofisa ole Konesula ile tulimanu o George Street ma Scott Street Liverpool, poo le telefoni 02 9602 1967.
