Aisea ua mamafa ai le Satauro o Keriso? Ole fesili lea sa faaautu pe sa tata‘i iai lagona ma manatu o tupulaga talavou ale ekalesia Metotisi ile mafutaga a autalavou ale Sinoti Metotisi i Saute ile Aso Faraile ole Aso Maliu, ile hall ale Malae Fesilafai i Manukau, ina ia faatāuaina ai e tupulaga talavou le maliu ole Alii Faaola.
Ole autu na toe tata‘i ma toe faatepa ai ile saunoaga ale Susuga ile Sea ole Faasinoti ia Masunu Utumapu i autalavou taitasi le tāua ole satauro o Keriso ile tama ma le teine talavou, e ala lea i lona faamalamalamaina o vaega e mafua ai ona mamafa le satauro o Keriso ile olaga ole talavou. (1) Ole amio le usitai, amio faaaloalo ile va ole isi talavou ma le isi talavou, ole va o mātua ma fanau, ole mea e fai ele isi talavou e faaleaga ai le isi talavou, o mea nei oloo mamafa ai le satauro o Keriso.
Ae ole tāua ole iloa ele talavou ona ava ma usitai i mātua, ava ole isi talavou ile isi talavou, ia iloa ona a‘oa‘oina lelei lana amio ma faaaloalo i soo se tagata ole māmā foi lea ole satauro o Iesu ile tama ma le teine talavou.
Ose mafutaga na toe mafuta faatasi ai le tino o Keriso i susuga i faafeagaiga ma o latou faletua faapea autalavou e sefululua oloo iai i totonu ole Sinoti ale Metotisi i Saute.
Ua taulamua susuga i faafeagaiga i lenei polokalame ina ia taumafai lava le aufaigaluega ia maua e fanau talavou le fealofani aemaise ai ole taumafai ia faafesoaa‘i le talalelei ale Atua i totonu o autalavou ina ia maua ai le nofo fealofani.
Ile saunoaga ale susuga ile tausi matagaluega ia Rev Laupepa ole pule autalavou lea ale Sinoti i Saute, ole sini ma le faamoemoe maualuga o nei mafutaga ina ia toe taumafai lea ia faamautu ma faaolaola pea le talalelei ale Atua i talavou.
E le gata i lea ia faaolaola pea le tāua ole tautala o fanau ile gagana Samoa, ma o nei polokalame uma ua maitauina ai le telē ole suiga ma le agai i luma ole faaaogāina o talavou i totonu o ekalesia ma mafutaga a aiga ile tu ma le aganuu a Samoa.
Ole polokalame ile Aso Faraile sa vaevaeina ai aulotu ole Sinoti i vaega e lua. Ole vaega muamua oloo iai le aulotu mai Manurewa, Manukau, Papatoetoe, Otara, Botany ma Magele.
Ole vaega lona lua oloo iai Middlemore, Tekuiti, Hamilton, Flat Bush, Weymouth ma Papakura. E tolu vaega sa agai iai le tauvaga, vaega muamua poo le A, sa tauva ile pese 196 olo ile tusi pese ale Metotisi ae ole B sa tauva ile pese e 193.
O aiaiga ole tauvaga pese ia sa‘o lelei le faaleoina o nota ole pese, ia mataalia le fuataimi ma ia lelei le ta piano. Ole faaevagelia na togi ile matagofie ole togiga, ole faatinoga, ole lagona ole faaevagelia, ole feau momoli faatasi ai ma le fesootaiga ole faaevagelia ma le autu ole mafutaga.
Ole tala, e lua autalavou sa faatinoina le tala ole Aso Maliu, ole autalavou mai Flat Bush lea sa latou faatinoina le tala mai le Tusi Paia faapea ma le autalavou mai Magele sa latou faatinoina le tala faasamoa ae sa fesootai ma le autu ole aso.
Ua molimau eseese lagona ole talalelei ile matagofie o feau momoli mai autalavou taitasi i lea aso ma ua faafaigata ai foi i faamasino le susuga ia Tupai mai Papatoetoe ma le susuga ia Fomai mai Weymouth ona saili le autalavou e ono manumalo auā ua taufai tutusa uma tapenaga a ekalesia taitasi.
Peitai e itiiti lava ni vaega sa eseese ai aufaipese ae faapea foi i faaevagelia, ae ole sini tāua o lenei faamoemoe ua faaaogāina ai tupulaga talavou i totonu o ekalesia e ala i polokalame eseese aemaise ai o taleni ua tuuina iai ele Atua.
Tauvaga Pese A.
Tutusa ai aufaipese e 3.
•Papatoetoe, Magele ma Manukau
•Manurewa ma Otara
•Botany
Tavaga Pese B
•Weymouth
•Papakura ma Hamilton
•Tekuiti
Tauvaga Faaevagelia A
•Manukau ma Papatoetoe
•Botany
•Otara
Tauvaga Faaevagelia B
•Hamilton ma Weymouth
•Papakura
•Middlemore
