Faailoa le ‘Umu Samoa’ i le TV SBS

Tamaitai faatonu o le Polokalame o le Food Safari ia Maeve O'Meara
Tamaitai faatonu o le Polokalame o le Food Safari ia Maeve O’Meara

O se tasi o polokalame TV iloga i Ausetalia ma le lalolagi le Food Safari na faavae ma amata faasalalauina i luga o le TV SBS o le a toe amatalia ana polokalame masani i le aso 7 Ianuari 2016-10 Mati 2016.

O lenei vaega fou e aofia ai kuka ma gasesega e silia i le selau o ituaiga taumafa eseese ma auala e tapena ma faavelaina ai mo le taumafa Talu mai le sefululua o tausaga talu ona amata le Food Safari, o le taimi muamua lenei ua faafesootai ai e le tamaitai Pule o le Polokalame ia Maeve O’Meara le pueina o le faalauiloaina o le Umu Samoa ma taumafa e aofia ai. O le auaunaga a le Polynesian Umu Cooker lea ua taamilo solo i Sini (on wheels) sa faafesootai e le SBS Food Safari ma tapena ai lenei sauniga aupito sili ona tāua i aso faipea i le soifuaga o Samoa.

I le aso 18 o Iulai na masii atu ai loa Maeve O’Meara ma le aupue Televise i le pitonuu o Jannali sa faafesootai e le ‘Polynesian Umu Cooker’ auā le faatautaiga o tapenaga o le Umu. O le tamaitai pule ia Sita Uesele ma le aufaigaluega aemaise le Tamaitai ia Serapina Salesa Caleo, Patrick Caleo, Tala‘ave Ray Salesa, Togitele Emani Piliae ma Maria T. Piliae sa faatinoina le ‘suavai’.

Sa maofa le tamaitai sooupu o le SBS TV i le faamatalaina o le tele o alagaupu ma muagagana e maua mai i faiva taitasi a Samoa lea foi e faaaogāina i tapenaga e pei ‘O le e Tofu Lava le Lou ma lona Fuata.’

Na saunoa le sui sooupu o le Umu Cooker o Samoa i aso anamua ae lei taunuu atu papalagi ma misionare o le tiute lea o tane ma tama o le gaseseina o taumafa e aofia ai le Umu.

O le taimi muamua foi lea na silasila ai le lalolagi, e tasi le pusaina o le umu ae aofia uma ai taumafa e tolu ia e faaigoaina faaperetania o le entrée, main course ma le dessert.

Na amata mai lava i pafa‘i e lagolago ai le umu o faamatala le uiga aua ne‘i solo. O le faavasegaina o maa laiti ma lapopoa i le taimi e uluulu ai le ogaumu ma aoga o maa eseese.

O le pusaina o le afi ma fetui maa ia ola ma aasa sa faamaumau uma i lalo e le au tusitala. Na uma see ane loa i sauniga pei o le vavaluina o talo ma ulu faapea le fofoeina o fai ae lei valuina le popo ma tatau ma toe faaaogāina penu e faaola atili ai le afi.

O atigi ipu sa toe faaaogāina i taoipu ma fai‘ai ula. O maa aasa sa toe lavai ai puaa ma mamoe sa taoina. O le peepee sa vaai foi i ai i le lasi o aoga e pei o le palusami, fai‘ai fee, vaisu, oka aemaise le mausa o le tamaitai ia Maeve O’Meara o le faausi talo.

Na saunoa Maeve o se taimi muamua lenei i le sefululua tausaga o le Food Safari ua molimauina ai se vaaiga faapenei aemaise le taimi na susunu ai le suka o le Faausi i se maa aasa ma usi le suka ma palasi ane i le niu.

Na taualuga e le faamagoto i ai o le maa aasa i le peepee ma pupusa ane ai le manogi matagofie o le faausi a o lafo i ai mafu. O le isi taumafa e fiafia i ai tagata matutua o le esi pula sa fisi ma tao ma le peepee i luga o maa ma usi lelei ma tatau i ai le tipolo. O se puligi foi auā le iputi sa faaofiofi i le pito i lalo ma manogi manaia. E ui o le tele o meaai ae na taualuga e le I‘a sa fili i le launiu ma faamanatu ai le isi alagaupu Samoa mai faiva, ‘E Poto le Tautai ae se lana atu i Ama.’

A o faapulou le suavai mo se itula sa lē talitonu le SBSTV e vela uma le tele o nei taumafa o tao i le Umu Samoa. O le isi alagaupu na faamatala i lea taimi o le ‘E mu loa le lima tapa i le iaofi’.

Sa vaaia ai foi le agavaa o le susuga Togitele Emani Piliae i le lalagaina o ato, mailo ma nai pulou launiu taumata mo Maeve ma le vaega a o talitali le fueina o le umu. Ma o le taimi na lagalaga ese ai tau ma laufai o le Umu na sasala mai ai le manogi o taumafa maofa ai le valaaulia. O le alagaupu masani, ‘O le Ala i le pule o le Tautua’ na faamatala auā taimi faapenei.

Sa lē maumanatu sui o le TV i le taimi na uma ai se faamagalo ma alo atu ai loa i le taumafataga felanulanuai ma le manogi ua talisua ai mai le umu e tasi ae lasi taumafa. Na foi ma le mama ua lomi ma le vaa ua goto le Televise ma o latou loto ua maofa i le sootaga o tatou taumafa ma tagata aemaise aiga ma le aganuu. O le polokalame lenei o le Umu Samoa ua filifilia e fai ma taualuga o le Food Safari i le aso sefulu o Mati 2016.