O Tuvalu o se tasi o motu laititi e fausia mai ‘amu o le sami ua faaalia e le au suesue i le olaga o le natura o mea o le lalolagi poo le au saienisi, ua lamatia lona faatumauina ona o le a goto ifo i le sami. O mafuaaga e pei ona faailoa i sailiiliga faasaienisi a ē popoto e mafua ona o suiga o le tau.
O le afea o Samoa e le Kovana Sili poo le Ao o le Malo o Tuvalu ma lona faletua, ona o le faauuga a le Iunivesite o le Pasefika e pei ona avea ai le Kovana ma Faaao o le iunivesite, sa feiloai atu ai i le afioga i le Ao Mamalu o le Malo ma lana masiofo.
O se feiloaiga i le maota o le Ao Mamalu i Vailele na feofoofoai taitai o atunuu, ma fetufaai i lagona faaalia sootaga o atunuu, aemaise o Tuvalu sa nonofo i Samoa nisi oo latou tagata ma faaigoa ai le nofoaga i gauta o Vaiusu o Elise e pei ona iai pea i nei aso.
O le latou gagana e itiiti lava nai vaega e eseese ai ma le gagana Samoa, ma o le talitonuga e vavalalata lava sootaga o atunuu e lua.
O le feiloaiga na faia i le Aso Faraile ua mavae na faia ai se faaaloalo a le Ao o le Malo i le Kovana ma lona faletua ma lana aumalaga, o se mealofa o se siapo Samoa ma se ie Samoa mao‘i.
Peitai o le feau sili ona tāua sa molimoli ane e le afioga i le Ao Mamalu ma lana masiofo, o le lagolagoina e Samoa o mafatiaga o Tuvalu i le mataupu i suiga o le tau ma le goto uga ai o motu uma o lea atunuu laititi o le Pasefika.
O le fetalaiga Tupai o se tulafale a le Ao o le Malo na fetalai ma faamanino le feau tau molimoli mo le Kovana ma lona atunuu i le tutu faatasi lea ma Samoa e faaleo ona mafatiaga i suiga o le tau.
Fetalai le tulafale a o faafofoga le Kovana Sili, o anamua sa iai tapu a Samoa ona o le puipuia o le siosiomaga peitai ona o le losilosi o papalagi i le ‘oa mai le gataifale, ua mafua ai ona tutupu faaletonu i le siosiomaga.
O se pese na fatuina faapitoa e lagolago atili ai le lagolago a Samoa na faaleoina e nisi o le afioaga mai Asau e pei ona faailoa ane e se tasi o le ofisa o le Ao o le Malo. Na taualuga le feiloaiga faaao o Malo i le va o taitai i se taumafataga o le tafolo niu na saunia e le Ao o le Malo ma lana masiofo.
