Ole Fonotaga muamua ale Fono Aoao a Tagata Samoa i Sini ile Aso Sa ua faalauiloa ai foi le pisi o lana kalena ole 2017, lea e amata ile faalauiloaina ole mafutaga a tagata matutua ole aai o Campbelltown ile faaiuga ole masina nei ua fuafua iai le faamoemoe ia maua se avanoa e feiloai ma tafafao faatasi i latou ma faasoa i polokalame e fesoasoani mo i latou.
Ole Aoga Samoa ale Fono ua amatalia foi i aai e lima ua oo atu iai, i lalo ole vaavaaiga ale tamaitai Pule ia Maria Tuitama Auvaa ma le vasega o faiaoga pasi. Sa molimauina foi semina o aoaoga ma matagaluega fesoasoani, i manaoga o fanau, aiga oloo latou moomia fesoasoani e pei ole Centrelink, Aoga, faapea le Soifua Maloloina lea sa faaautu ile failautusi, le Afioga Tuioti Ruta Tonumaipe‘a.
Ile alo atu ile Faamanatuina ole Samoa Day ia Iuni ole a toe faamausali atili ai polokalame o siva, gagana ma faiva faasamoa ma le manatu e faafoeina uma ile gagana Samoa, ia aotauina ai tupulaga ma fanauiti e faamasani ma tautala ile gagana.
Ole taumafaiga ia faamalosia ma faamasani tatou fanau ia saoloto ma faatāua ma mitamita ile tautala faasamoa.
Ole sauniga lotu ua fuafua e faia ile Malumalu tele ale Sacred Heart i Liverpool, ina ia ofi ai le mamalu ole atunuu aemaise o Liverpool e tutotonu e faigofie ona agai mai iai tagata uma. Ole tausaga nei ua suia ai le nofoaga e faia ai le Siva ole Faamanatuina ole Fu‘a ole Tutoatasi o Samoa, lea ua tapenaina ai le Club Condell Park, lea sa igoa muamua ole Trotting Club.
Ile masina o Oketopa ua fuafua iai le tausaga lona lua ole aso taalo poo le Samoa Sports Day lea sa faatautaia ai e lē gata o faafiafiaga, o siva ma pesepesega faatasi ai ma fale‘aiga, taaloga volipolo, ma le lakapi OZ Tag. Ose vaaiga mataina na iai le talenia o fanau Samoa ma le Pasefika na tauva ile OZ Tag faapea le netipolo.
Ole taualuga ole tausaga 2017 ole Luau ole Kerisimasi ia Novema, e faaiu ai galuega ole tausaga ma valaaulia ai foi aiga uo ma ē masani faapea kamupani sa lagolagoina le Fono e fiafia faatasi ai ma sauni atu ai i aso fiafia ole Kerisimasi. Mo nisi faamatalaga valaau ane ile 0406117912 pe asiasi ane ile facebook: Samoan Council Sydney Inc.
