Ua aulia mai ma le manuia le tausaga fou ae ua faafeiloai e se tala faanoanoa e uiga i le umi na ono taumamafa ai le mamalu o le atunuu i Sini nei i aano o manu e pei o mamoe, moa ma le povi ua faaaogāina ai se ituaiga kelū oona (meat glue).
O lenei sailiga na faamautuina i luga o Televise i le Alāata Fitu i la latou polokalame Today Tonight e faapupula ai lenei faiga matautia.
O le faiga lea e nisi o fale o loo faatau ai aano manufasi (butchery) ma faleoloa o toega o aano o mamoe, moa ma le povi ma toe faapipii faatasi e le ‘kelū aano’.
O lenei faiga ua tele na faasāina i atunuu Europa sa uluai maua ai ae peitai e leai se tulafono i Ausetalia nei e puipuia ai le faaaogāina o lenei ‘kelū’.
Sa faalauiloaina mai faapea, o toega o fasipovi, moa, mamoe e ao uma e lē faatama‘ia pe lafoai, ae ma o le tasi lava se sipuniti o le ‘pauta kelū’ e lulu i le tusa ma le tasi le kilo o aano eseese nei, ona lola lea ma afifi a o lei tuuina i totonu o le pusa‘aisa mo le ono itula. E toe aumai i fafo e ua pei lava o se kilo atoa o le povi (steak), mamoe, moa (thigh/breast). O lenei faiga ua mafai ona toe faatauina atu ai o ni aano taugata e pei o Steaks (eye fillet) moa ma le mamoe. O le itu faigata e toatele i latou e taumamafa ai i aiga ma pitonuu aemaise i faleaiga ma faletalimalo e lē silafia lenei faiga.
E lē gata i lea o lenei ‘kelū’ (meat glue) e gaosi mai se siama (cultivated bacteria) e uma ona faamago ma liu pauta. O le tele o nei faaaogāina e ono maua ai tagata i le ‘ona e mafua mai i taumafa (food poisoning).
O le toatele foi na maimoaina lenei lapataiga i le televise ua amata fesili i faleoloa ma fale fasimanu pe o latou faaaogāina nei pauta. Mo nisi e mumusu e fesili ua agai atu nei e faitau ma mataala i pepa faamauina o loo pipii i aano o manufasi e iloa ai pe moni ma mamā fasipovi, mamoe, ma moa o loo faatauina.
O se tasi lenei o matafaioi a tagata aemaise nai o tatou aiga Samoa ma le Pasefika na matuai mamafa le tausasami i aano o manufasi i le vaitau o aso fiafia, ma ua popole poo se auala ea lea ua aafia ai nisi i gasegase e pei o le kanesa ma le toto maualuga pe afai ua loa ona tausasami i nei ‘pauta.’
O le matautia o lenei faiga e aunoa ma ni vaaiga, tofo ma le kukaina e iloa ai le oona o i totonu.
