E tasi lava le auga ma le faamoemoe maualuga ole mamalu ole atunuu mai tagata matutua seia oo i fanauiti sa auai ile savali ole filemu ile taeao ole Aso Toonai ile taulaga faatau i Magele, ole latou faailoa atu lea ile malo o Samoa ma lana faigamalo, lo latou tetee atu ile tulafono fou lea ua faaigoaina ole LTRA 2008 lea ua oia ai fanua faaleaganuu a Samoa.
O lenei faamoemoe sa tuufaatasia lea ele Sosaiete ale SSIG i Niu Sila ma le agaga maualuga ia mafai ona foia lea faafitauli ua tulai mai i measina ma meatotino a tagata Samoa, na tauasa ma tigaina ai mātua ua fai i lagi le folauga.
Ole aso foi lea sa faatinoina ai le savali i Samoa ile motu tele i Salafai, lea foi sa maitauina ai i luga o upega tafailagi le malosi ole lagolago a Savaii i lea faamoemoe. Ma ole agaga lea e tasi ua taufai galulue ai le sosaiete ale SSIG i soo se itu ole lalolagi ina ia mafai aveesea.
I manatu o nisi ole atunuu sa auai ile savali ile Aso Toonai e faapea, ua tiga o latou loto ma faanoanoa, ona ua amata ona faatalitonuina lagona ole atunuu i mea ua tutupu nei i fanua o Samoa e ala ile tulafono lea.
Ole isi itu, oloo tuufesili ai manatu, o iai ni fanua poo ni aseta tetele ale malo e fai agai iai aitalafu tetele ale malo lea oloo iai nei, pe a oo ina toe agai atu atunuu i fafo e faapea mai e totogi mai aitalafu nei?
E leai se mea, o lona uiga o fanua nei o aiga oloo iai, ole a fuafua e totogi ai nei aitalaafu pe a oo ina malosi le tulafono lea i totonu ole atunuu. Ua fai si tele o tausaga o nonofo i fafo ae lē mafai ona tuua ai le malaga i Samoa e faamaopoopo mea e fai a aiga ma galulue faatasi ma aiga i Samoa.
E iai le lagona o tagata oloo nonofo i fafo, o lea oloo tutupu a’e a latou fanau i atunuu i fafo, ma ole ala foi lea ole taumafai e faasavavali fanau laiti i lenei savali tetee, ina ia latou iloa ma manatua ai ile lumanai le saili malo ma le ola finau o latou mātua ile faamautuina o measina ma meatotino a o latou aiga i Samoa.
Auā ole upu moni e alu aso sau aso e lē iloa poo fea a agai iai fanau ile lumanai pe a oo ina saoasaoa le alu ole tulafono lea i Samoa. Ole tagata ma lona tupuaga ole tagata foi ma lona faasinomaga.
Ole ala lava lea ole lagolago ile Savali ole tetee, ina ia faailoa atu ai ile malo e matuā lē lagolagoina le tulafono lea ua oia ai fanua faaleaganuu o aiga Samoa.
Ole savali foi lenei na tuu e auai atu ai ma le Tama Aiga le afioga ia Tupua Tamasese Efi i sana saunoaga autu ile savali i Savaii, peitai ane, e lei taunuu lea faamoemoe. Ae na faailoa le finagalo ole susuga ia Manufui Peterson ile mafuaaga ua lē auai atu ai le Tama Aiga i Savaii ona e faapea, sa tuuina atu se tusi aloaia mai le afioga ia Tupua Tamasese Efi ile sosaiete e faalalolalo atu ai, ua lē mafai ona auai atu ile savali, ona ua fautuaina ia e lona aiga ma lona nuu e aua ne’i tu faapitotasi, pe faaitu’au.
A fai sona finagalo ona faailoa lea faalauaitele ae aua nei tu na’o le sosaiete, ma ole mafuaaga lea olo tapena ai lana press conference ile mataupu lava lenei ile vaiaso fou.
Sa tuuina atu lava lana faamanuiaga ile faamoemoe ole savali a Savaii faapea ma savali a isi atunuu e pei ona faataunuuina ile Aso Toonai.
