Faailoa galuega lelei a Tina i le latou Aso Sa faapitoa

Aso Sa o Tina ekalesia Metotisi Onehunga - Photo: Noa Iosefa
Aso Sa o Tina ekalesia Metotisi Onehunga – Photo: Noa Iosefa

O le faalupega o tina o loo faalupe ai o le pae ma le auli, na te faamafolafola ni mea ua maanuminumi pe faaletonu i totonu o le aiga faapea le Ekalesia, o le fautua foi i le ulu auā o le finagalo lea o le Atua na fausia ai le aiga ina ia iai le tamā ma le tina ma le fanau o le tafatolu lea o le aiga.

O le faagasoloina o Aso Faapitoa o le tausaga o le tasi lea vaitaimi pisi o le tausaga pe a oo i le Aso mo Tina, e tāua ai i le tamā ma le fanau tapenaga mo le Aso Sa ina ia lelei ma aulelei le tina. O nisi o Ekalesia e tapena le toonai faatasi a le Ekalesia atoa e fiafia ai aiga uma, a o isi ua tatala le avanoa e toonai faatasi ai le tamā, fanau ma le tina.

Aso Sa o Tina ekalesia EFKAS Newton - Photo: Grace Ferila Mikaele
Aso Sa o Tina ekalesia EFKAS Newton – Photo: Grace Ferila Mikaele

Ae o tapenapenaga ma sauniuniga o lea Aso ua tuu ai le avanoa i tina latou te faagasoloina ai le faatinoina o le polokalame o le Aso Sa.

O le aso foi lea ua faailoa ai teuga matagofie ma laei eseese a tina ma toe faafofoga ai tamā ma fanau i tautinoga ma galuega lelei a le tina o loo faatinoina totonu o le aiga aemaise o le Ekalesia. Ae lē gata i lea o molimau a nai tina matutua ua silia i le 80 tausaga agai i luga.

O nisi o Ekalesia ua avea le mafutaga a tamā ma avefeau o lea aso ae usi le maimoa ma le silasila a tina, e ui i le suifefiloi o sauniuniga a Ekalesia eseese ae tasi lava le auga ma le faamoemoe o polokalame, o le faatāuaina o tina i totonu o aiga ma Ekalesia.

O le molimau a tina, a leai se tina i totonu o le aiga ua lē atoatoa ma maopoopo aiga ma Ekalesia ae sili ai le lē atoatoa o le fiafia o le tamā.

E mālie i le faalogologo ae o loo afifi mai ai se mea moni o loo tupu i lenei vaitau o le soifuaga, le tāua o le iai o le tina i totonu o le aiga.